Sokratis Papastathopoulos chuan Vicarage Road-a Watford nen an inhnehtawk kha pawi a tih thu sawiin, amah vang liau liaua point 3 hmu lo an nih thu a sawi.

Arsenal chuan Watford nen an inkhelh hian Pierre-Emerick Aubameyang goal hnih thun hmangin 2-0 in hma an hruai a. A hnuah erawh an lamah goal hnih an chhuah ve leh a, hei vang hian hun tawpah 2-2 in an inhnehtawk phah a ni.

Second half an khelh leh hnu lawkah Sokratis Papastathopoulos chuan ball pet chhuak tha mai loin Matteo Guendouzi chu pek a tum a, hei hi Gerard Deulofeu chuan a lo khawih peng a. Ball chu Tom Cleverley chuan Arsenal goal-ah a thun a, an si phurh pakhat chu a sut theih phah a ni.

Hemi hnuah hian David Luiz chuan Roberto Pereyra chu Arsenal box chhungah a titlu a, hei vang hian Watford chuan penalty an hlawh a, hemi hmang hian penalty hlwh chhuaktu Pereyra chuan an si phurh pakhat chu a sut ve leh a ni.

Papastathopoulos chuan, “Keimah vangin point 3 hmu thei turin kan hmuh loh phah niin ka hria a. Ho lutukin thil ka tisual a, ka tih loh tawp tur ka tih vangin lehlamin goal an rawn thun theih phah a ni,” a ti.

“Ka thil tihsual vang hian point 3 kan hloh phah ni berin ka hria a. Mi dang kha chu ka sawi tel duh lo a, keimah ngawr ngawr kha a ni ber a. Ka tih dik loh rah kan seng a, kan tana point 3 hmuh theihna turah kan hmu thei ta lo. Eng dang mah a awm lo,” a ti bawk.

Greece centre-back chuan, “Ka teammate te kha chuan theihtawp an chhuah a, chak ngei tumin tan an la vek hlawm a. Kei pawhin thahnem ka ngai viau a, mahse, ka tisual ta tlat mai si a, engkim kha a pawi zo ta vek a. Tisual lo ila chuan point 3 kan hmu thei mai tur ania,” a ti.

Arsenal centre-back Sokratis Papastathopoulos hian amah avanga point 3 an hloh chungchangah an club tantute hnenah ngaihdam a dil bawk a ni.