Luka Doncic chuan a ke rek tina mah se Los Angeles Clippers lakah Dallas Mavericks chu a chakpui thei ta tho a ni.

Dallas Mavericks leh Los Angeles Clippers inkhel hi a boruak a sang hle a, chak zawk tur hriat harsa khawpin a tawp thlengin an inhnehtawk hle a. Luka Doncic chuan hun tawp rualin three-point a thun a, Dallas chu 135-133 in a chakpui thei hram a ni.

Kum 21-a upa Slovenian star chuan a ke rek a tina a, a kawppui Kristaps Porzingis chu a inlan lo bawk a. Heti chung hian Doncic chuan point 43 zet mai a thun bakah rebound 17 a la a, assist 13 a nei bawk a. NBA Western Conference playoff first round-ah hian Mavericks leh Clippers te chu vawi hnih ve ve an chak ta a ni.

Doncic chu he inkhelah hian a che tha hle a, second 50 a la awm tihin a thun a, 130-130 a ni chiah a. Second 19 chauh a awm tawh a, Doncic bawk hian a thun leh a, Mavericks chun point 2 in hma an hruai a. Hun tawp rual chiahin feet 27 atangin Luka Doncic hian three-point a score a, Dallas chu a chakpui hlauh a ni.

“Hun tawp rualin basket chhungah ball a lut tih ka hmuh khan ka lawm dan kha chu sawi fiah theih chi pawh a ni lo, lawm tak ka ni tawp,” tiin Luka Doncic chuan a sawi.

“A tawpa ka thun chiah khan ka teammate te chuan min rawn pan khawm nghal a, khatiang tluka nuam kha a awm chuang lo reng reng. Player ka nih chhunga nuam ka tih ber pawl a ni,” a ti bawk.

A vawi khatna atana NBA playoff kheltu Doncic hian Porzingis tel loin Dallas Mavericks chu a chakpui thei a. Game three an khelh laiin second half-ah a ke rek a tina a, Inrinniah khan MRI te an ti a, a ke nat dan an en chiang a. Hetianga a ke a tina chung pawh hian Los Angeles Clippers chu an hneh thei ta tho a ni.

Trey Burke chuan point 25 a thun a, Tim Hardaway chuan point 21 a score a, Seth Curry pawhin Dallas tan hian point 15 chu a score bawk a ni.

Mavericks te vawi hnih ve ve an la chak lai hian Boston chuan 110-106 in Philadelphia 76ers an hneh a, anni hi second round lut thei hmasa ber an ni.

Celtics tan Kemba Walker chuan point 32 a score a, Jayson Tatum pawhin point 28 a score bakah rebound 15 a la bawk a, Easter Conference first-round series-ah 4-0 in an chak a ni.