02 Nov 2015 05:24

Inkhel

Mizo Sports Website hmasa ber

​KDFA CUP 2015 khelh zawh a ni ta

Kolasib District Football Association buatsaih Under 14 leh Under 12 tournament chu Inrinni, ni 31.10.2015 khan zawh fel a ni a. Project Veng FC chuan Venglai FC chu sikhat faia hnehin Under 14 champion an ni a, Zonunmawia Memorial FC, Diakkawn chuan penalty shoot-out-ah Project Veng FC chu 4-3 a hnehin Under 12 champion an ni bawk.

UNDER 14 CHAMPION PROJECT VENG FC


Kolasib Project Veng FC hi Under 14 leh 12 ah double champion ni turin chance tha tak an nei a, Under 14 Final match hmasa zawk hmuhnawm takah first half-ah goal a luh loh hnu ah, second half minutes 32 ah midfielder Andrew Lalliansanga chuan he match a goal awmchhun leh Project veng FC champion-na goal chu a tauhlut ta hlauh mai a, goal khung harsat Venglai FC tan he goal hi sut tumin bei ngial mahse, Project FC tan Andrew Goal khat khung hi an champion-na goal atan a lo tawk reng a, an champion zui ta a ni.

UNDER 12 CHAMPION ZONUNMAWIA MEM.FC,DIAKKAWN


DFA Cup 2015 Under 12 final ah hian Project FC chuan ni khata match hnih khelh zawn an zo lo deuh niin a lang a, zing dar 7:00-a semi final-a Venglai Young Boys 5-0 ngawtin sawp mahse, darkar 7 hnu ah final an khel zui leh mai si a, second half ah an chau tih a lang reng ,mai si a, hei hi an champion loh chhan ni a ngaih theih a nih rualin, Project Football club te hian double champion nih theihna kawng an hloh ta niin a lang bawk. Project FC U12 team hian ni khata match hnih an khelh chhan hi Hmarveng lam atang U12 team lo chhuak ten Match Commissioner buma thil an tih vang a ni.

U12 final-ah hian first half a goal a luh loh hnuah second half tan atanga minutes 10 vel a liam hman tihah Zonunmawia Memorial FC, Diakkawn chuan freekick an hmu hlauh a, hei hi midfielder Jeremy Lalsangliana chuan mawi takin keeper veilam ah pet lutin goal ah a chantir a, he goal hi player chau zawk Project FC tan sut leh chu thil huphurhawm tak niin a lang zui bawk.

Nimahsela, chau tak chung pawha an u te champion tawh tih hria a, beidawng duh lova bei talh talhtu Project veng naupang zawk te chuan hun tawp rual deuh thawin Lalpekhlua hmangin an sut ta hlauh a, 1-1 niin, penalty atanga chak zawk zawn a ngai ta a ni.

Penalty shoot-out –ah Zonunmawia Memorial FC, Diakkawn chuan 4-3 a vannei zawkah tangin, Project FC ten double champion nih beiseina chu tihtawp sakin an champion zui ta a ni.

TROPHY LEH A KAIHHNAWIH

U14 champion hian Trophy bakah tangkafai Rs.4000 dawngin, runner-up in Trophy bakah tangkafai Rs.2000 an dawng a, U12 champion Zonunmawia Memorial FC, Diakkawn chuan Trophy bakah tangkaifai RS.3000 dawngin, runner-up Project FC chuan trophy bakah tangkai fai Rs.2000 an dawng bawk a ni.

Player mal tin hetiang hian lawman sem a ni a, U14 Best Keeper atan Venglai FC Keeper David VL Hmangaihzuala thlan a ni a, Best Midfielder-ah Vanlalrempuia, Project FC thlan niin, best defender-ah Lalrinsanga, Venglai FC thlan a ni a, Best striker-ah Lalnunsanga, Venglai FC thlan a ni bawk. U12 ah Best Keeper atan Zoramsangzela Zonunmawia Memorial FC, Diakkawn thlan a ni a, Best Midfielder-ah Jeremy Lalsangliana Zonunmawia Memorial FC, Diakkawn chu thlan a ni bawk a, Best striker atan Lalpekhlua Project FC chu thlan a ni bawk.

source : Maa Pachuau