18 Oct 2018 04:38

inkhel

Kawhi-a’n Raptors a chakpui nghal

Kawhi Leonard chuan Toronto Raptors chu bul a tanpui tha hle a, Raptors tana a game hmasa berah Cleveland Cavaliers lakah a chakpui nghal.

Toronto Raptors leh Cleveland Cavaliers te inkhelah hian Kawhi Leonard chuan point 24 a score bakah rebound 12 a la bawk a, Raptors chu 116-104 in an chak a, opening-night match bikah vawi 6 chu an chak ta a ni.

Leonard chuan, “A nuam ka ti khawp mai a, theihtawp kan chhuah a, kan chak thei kha a lawmawm ka ti a. Ka khel tha pangngai a, ka tan chuan a lawmawm lehzual a ni,” a ti.

July thla khan Raptors chuan Spurs atangin Kawhi Leonard hi an la lut a, All-Star DeMar DeRozan chu San Antonio lamah a kal ve thung a. Mipui 19,915 zet te chuan Kawhi hi an lo lawm lut a ni.

January thlaa Spurs tana a khelh hnua competitive game a khelh leh hmasak berah Leonard hian minute 37 chhung a khel a. NBA Defensive Player of the Year vawi hnih lo ni tawh hi season hmasa khan a inhliam avangin game 9 chauh a khel thei a ni.

Nick Nurse chuan head coach anga a game hmasa berah Raptors a chakpui a, Fred VanVleet chuan point 14 a thun a, Pascal Siakam chuan point 13 thunin Green chuan point 11 a thun bawk a ni.

Toronto Raptors chu 2011 atanga 2016 inkara Miami in an lo puitlin tawh tih lohah opening match-a chak zawn rei ber an ni ta a, vawi 6 an chak tling tawh a ni.

Kevin Love chuan Cavaliers tan point 21 a thun a, Cedi Osman pawhin point 17 thunin rebound 10 a la bawk a. Jordan Clarkson leh George Hill te chuan point 15 ve ve an thun a, Rodney Hood chuan point 12 a thun bawk a ni.

Cleveland hian season hnuhnung pathumah Toronto hi playoff atangin an lo nek chhuak tawh a. An thiampuipa LeBron James chuan Los Angeles Lakers lam a pan tak avangin a hma an ang pha tawh lo niin a lang.

Anni pahnih inkhelhah hnuhnung 17 ah hian Cleveland chu vawi 15 an chak tawh a, post-season game 10 chhung an chak zawn tawh bawk.