23 Oct 2019 05:08

inkhel

Kawhi-a’n Clippers a chakpui

Kawhi Leonard chuan point 30 a thun a, Los Angeles Clippers chu Los Angeles Lakers lakah 112-102 in a chakpui.

Season bul tannaah Kawhi Leonard chuan bung thar kaiin, a team thar chu a chakpui thei nghal a. Staples Centre-a NBA huang chhunga player tha ber ber pali - LeBron James, Kawhi Leonard, Anthony Davis leh Paul George te telna inkhel hi Raptors star hlui tan inkhel nghahhlelhawm tak mai a ni a, Lakers tantute erawh chuan an au el nasa hle.

Kum 28-a upa Kawhi hian court chhungah a thiamna a lantir a, point 30 a score bakah hian a teammate tharte nen an inmil nghal zia a tilang a, a bik takin Paul George leh Lou Williams te nen an thawhhona a tha viau a. Leonard hian rebound 6 a lak bakah assist 5, steal 2 leh block 1 a nei bawk a ni.

Lou Williams chuan point 21 a thun ve bawk a, Montrezl Harrell pawhin point 17 chu a score ve bawk a. Clippers hian season 50 an hmang tan ve chiah a, a hmaa rin kai ngai lo kha tun season bikah chuan NBA championship title la thei tura rin kai berte zingah an tel thei a ni.

Lakers tan Anthony Davis chuan point 25 a thun a, free throw 14 thehah vawi 9 a thun a, LeBron James chuan point 18 a score ve bawk a. Danny Green chuan point 28 chu a thun a ni.

Season liam taah khan Kawhi Leonard chuan a Toronto lamah NBA title a la a, hei hi a title lak vawi hnihna a ni a. Toronto Raptors-a a teammate hluite hnenah chuan an champion avangin Championship ring an hlan hlawm a ni.