Tunlai zaithiam leh hla phuah thiam lar tak Anne-Marie hi kan hre deuh vekin a rinawma, a zaithiam zia leh a chhiat loh em avanga lar niin, a phenah a turu zek bawk.

English nula Anne-Marie hi a hmel han en chuan nu ve tak, tharum thawh lam han ti mi lo tak a ni tih a hriat hle a, mahse a mah hi karate chikhat Shotokan karate-a black belt a ni.

A hmingpum chu Anne-Marie Rose Nicholson a ni a, April ni 7 kum 1991 khan England-a Essex-ah piangin, tunah hian kum 29 mi a ni meka, kum 9 lek a nih lai atangin karate a luhchilh tawh.

Anne-Marie hi karate black belt a ni mai lova, khawvel pum karate inelnaah pawh a ber nihna a lo hauh nual tawh; 2002 Funakoshi Shotokan Karate Association World Championship-ah khan Anne-Marie hian Double Gold a lo la tawha, 2007 Funakoshi Shotokan Karate Association World Championship-ah Gold leh Silver a lak tawh bakah United Kingdom Traditional Karate Federation National Champioship-ah khan Gold lo la tawh bawkin, mi turu tak a ni a tih loh theih loh.

Tunah erawh Anne-Marie hian karate hi a chawlhsan titih tawha, zai leh hla phuah lamah kalta zawkin, karate chu a khawt mawi tawkin a practice chauh tawh a ni.

Kum 2015 khan Anne-Marie hian a EP hmasa ber Karate tih a release a, he EP-ah hian a EP hming pu tu Karate tih hla music video chu Karate lam hawi a ni nghe nghe.

Mi tam zawkin Anne-Marie kan hriat tanna erawh Clean Bandit ho hla Rockabye atang a ni a, hetah hian Anne-Marie leh Sean Paul te chu Clean Bandit hian vocals atan an hmanga, he hla hi a lar hle a, UK Singles Charts-ah a zawnin chawlhkar kua zet no.1 a ni.

Anne-Marie hian a EP Karate bakah album pakhat Speak Your Mind a nei a, heng bakah hian Singles 26 lai neiin, a hla lar zual te chu Alarm, Ciao Adios, Friends leh 2002 te an ni a tih theih awm e.

Bonus Pics: