Arsenal manager hlui Arsene Wenger chu League Manager Assosciation (LMA) chuan LMA Service to Football lawmman an hlan a, he award hi Wembley-a sem a ni.

Wenger hian kum 22 chhung ngawt London club Arsenal a enkawla, Gunners a enkawl chhung hian Premier League title pathum leh FA Cup title pasarih a chawi hman. LMA chief executive Richard Bevan chuan, “LMA chuan football management lama Arsene-a hnathawh zawng zawng chu kan hre reng a ni tih kan lan tir.

“Kum 1996-a Highbury-a Arsene-a match hmasa ber atang khan football a inthlakdanglam nasa em em a, he kum 22 chhhunga a hnathawh zawng zawng hian hriat reng a phu a ni,” a ti,

Lawmman a dawn pah hian Arsene Wenger chuan kartin trophy a lak tak thu fiamthu a sawiin ,”Inelnaah ka tel ta lo bawka, kar tin mai hian trophy ka chawi ta a ni. Engvangin nge heti ang a ni dawn tih hi a hma khan ka lo hriat daih tawh loh,” a ti uang.

Arsene Wenger hian Arsenal chu enkawl rei hle mahse trophy a chawi tam hran lova, engtik lai emaw kha chuan kum kaw chhung trophy chawi loh pawh an nei hial a ni.