Real Madrid leh Wales player Gareth Bale chu Chinese club Jiangsu Suning chuan ngawrh taka dawrin contract hmui tak nen an thlem meka, Bale hian Chinese club zawm hi a remti tawh niin Chinese lam media chuan an tarlang.

Real Madrid lam hian Bale hi hralh chhuah an duh a, mahse Bale hian chhuah a duh lem lo. Real manager Zinedine Zidane chuan Bale hi chhuak thuai tura a duh thu a lo sawi tawha, heti anga a tawng avang hian Bale-a agent pawhin Zidane hi na takin a lo dem tawh.

Kum 30 mi Bale hi Jiangsu Suning chuan kar khatah pound maktaduai khat lawih hlawh turin an thlem mek niin chanchinthar lakhawmtute chuan an tarlanga, hei hi Bale chuan a pawm ta niin tarlan a ni.

Chinese journalist Bai Guohua chuan Bale leh Jiangsu inrem thu hi a sawi a, Guoho hian Bale hi Chinese club dang Beijing Guo’an pawhin lakluh tum ve mahse Jiangsu hian an chang ta zawk tih a sawi tel nghe nghe.

Bale hian kum ruk kalta khan Real Madrid hi a zawma, Real-in an lei lai hian khawvela footballer manto ber a ni nghe nghe a, tunah hian kar khatah pound 600,000 vel a hlawh nia sawi a ni.

A hlawh a tam si, inhliam a hrat bawk si avangin club tam tak hian Real atangin Bale hi an leichhuak ngam lova, tum loh deuhin China lam a pan ta zawk dawn ni pawhin a lang a ni.