Son Heung-min chuan South Korea-a kangmei tuarte tanpuina atan ama sum chu £100,000 (Rs. 90,91,950/-) zet mai a hlan.

April 5 tlai khan transformer tek atanga kangmei intan nia ngaih chu a nasa chho hle a. South Korea ram chhung, North Korea nen an inrina bawr vel, hmar chhak lampang tlangram chu a kang vak mai a. He kangmei chhuakah hian mihring pahnih an thih bakah, mi tam tak chuan chenna an neih loh phah bawk a. Thuneitute chuan South Korea chanchinah chuan hetiang taka nasaa kangmei chhuah hi a la awm ngai lo niin an sawi.

Kangmei chhuak vanga harsatna tawkte tanpuina leh chhawmdawlna atan hian Tottenham Hotspur striker Son Heung-min chuan pawisa hi Inrinnia Huddersfield Town an hneh hnu khan a hlan a, fak pawh a hlawh hle.

Spurs striker Son chuan, “Ka thil tih avang hian min fakna thawm te a ri a, mahse hei hi chu kangmei tuartute inpekna nen khaikhin chuan engmah tham a ni lo,” a ti.

“Ram dang daihah awm mah ila, kan ram chhunga thil thleng hi chu ka hre ve vek tho a. Kan ramah chhiatna rapthlak tak mai a thleng a, eng emaw tak ka tih ve ngei a ngaiin ka hria a. Pawisa kha a pawimawh ber lo tih chu ka hria a, a tuartute tana thil eng emaw tak tih tluka pawimawh a awm lo,” a ti bawk.

South Korean striker Son hian nikum September thla khan Asian Games football ah an ram team chu a champion pui a, hetianga title a lakpui avang hian sipai tan pawh a pumpelh theih phah nghe nghe a ni.

Tun season chhungin inelna kawng hrang hrangah Son hian goal 18 a thun tawh a, a goal thun hnuhnung ber hmangin Tottenham chuan UEFA Champions League quarter final-ah Manchester City chu 1-0 in an hneh theih phah a. Nilai zan hian Etihad Stadium-ah an lenchilh ve dawn a ni.