Manchester United leh Real Madrid te chuan England striker Harry Kane an ngaihven mek nia report a ni a. Hetih lai hian Tottenham hian chelh an tum tlat niin a lang mek e.

Daniel Levy chuan chhuahtir a phal dawn lo tih chu tlang hriat a ni. An chelh theihna tur a nih dawn phawt chuan Kane-a man an chhiar sang ta niin a ngaih theih.

English media ten an tarlan dan chuan, Tottenham hian thla leh lawka kum 30 tling mai tawh tur Kane-a manah hian €115M an chhiar hem mai. Tin, Harry Kane pawh hian kum khat chhungin €20M aia hniam hlawh a tum lo an ti bawk.

Hei hi thu dik a nih chuan Real Madrid leh Manchester United te hi vawk hnara khawn ang maiin an hawi let maithei a ni. Carlo Ancelotti chuan an president hnenah Harry Kane a duh thu a sawi niin The Athletic chuan a tarlang.

Real Madrid hian Benzema hmunruak luahkhat turin Kane hi an mamawh tak zet. Hetih lai hian official-in Real Madrid leh Tottenham te hi Kane-a chungchangah an la inbe lo thung.

Kum 30 tling tawh mai tur manah €115M lai an chhiar nia report a ni, a to mah mah, a kum ngaihtuah chuan hetiang zat zat man tur a ni tawh lo niin football pundit te chuan an sawi mek e.

Real Madrid hian Bellingham-a manah €100M chuang an seng dawn nia report a ni a, heti zat zata Kane la tur chuan Real Madrid hian theihna an nei dawn lo nia ngaih a ni.

Season khat chiah Tottenham-ah Kane hian contract a nei tawh, heti chung hian €115M vel man a ni mai tur hi chu a to dawn hle a ni. 

Engpawh nise, official-in Manchester United leh Real Madrid te hian Tottenham an la dawr lo a, Harry Kane-a'n chhuah a duh tlat a nih chuan, a man pawh an indawn hniam theih rin a ni.