Nilaini zan khan Sevilla hnehin Manchester City chuan UEFA Super Cup an chawi a, team hnih te 1-1 in an inhnehtawk a, penalty shootout-ah City chuan 5-4 in hnehna an chang a, kumin hian City hian trophy lian 4 an chawi ta a ni.

Sevilla an hmachhawn tum hian Brazilian goalkeeper Ederson a khel tha lek pek hle, Pep Guardiola chuan a goalkeeper fakin, Champions League final ang bawka an innghahna a nih leh thu a sawi chhuak.

"Eddie kan nei hi kan vannei tak zet a ni. Champions League Final-a Inter Milan kan hneh tum ang mai khan, min chhanhim leh ta a ni.

"Final-a goalkeeper te player pawimawh an nih tum hi a awm nual mai, Eddie hi kan vanneihpui a ni.

"Inkhelh pumpui thlir chuan, kan khel tha ve reng. A tawp minute 30 chhung kha chu kan khel tha tak zet a ni," tiin City boss Pep Guardiola chuan a sawi.

Tan atanga minute 25-ah En-Nesyri chuan Sevilla tan goal khung mah se, second half minute 63-ah Palmer chuan City siphurh a rul a, team hnih te hun pangngaiah 1-1 in an inhnehtawk. Penalty shootout neih nghal a ni a, a tawp bera pet Nemanja Gudelj chuan goal bar a pet per hlauh, 5-4 in City an chak ta a ni.

Pep Guardiola chuan, "Palmer-a hma hun tur chungchang hi chu ka hre mai bik lo. Loan-a kan chhuahtir ka ring lo, kan hnenah a cham chhunzawm dawn nge? A chhuak dawn? Sawi theih a ni lo.

"Defender tha Acuna te hmachhawn kha a awlsam hauh lo, ani player naupang, final-ah khati khawp khan a khel thei a. Palmer hi player tha a ni a, goal pawimawh leh mawi tak a khung bawk," tiin a sawi.

Cole Palmer hian Etihad Stadium a chhuahsan dawn em? City boss pawhin a sawi chiang thei lo. England Under 21 international hi chhuak tur anga ngaih a ni a, ani hi City academy chhuak niin, player an neih that thin em avangin hmun a chang hleithei lo.

Pre-season ah tha takin a khel a, Riyad Mahrez a chhuak a, De Bruyne a inhliam bawk nen. Winger-a chhawr theih tur City hian an nei tam lo, hei vang hian Guardiola chuan a chelh mai rinna a lian ta hle a ni.