Liverpool chuan Inrinni tlai khan Premier League inkhelah Crystal Palace an hneh hram a, Palace laka point 3 an hlawhchhuak thei chu an vannei niin Liverpool manager Jurgen Klopp chuan a sawi.

Liverpool hian London club Palace hi Selhurst Park-ah 2-1 in an hneh a, Liverpool hian si an phur hmasa a, an chakna goal hun injury time-a an khung a ni bawk a, point 3 an hlawhchhuak lo teuh lo. Palace laka point 3 an hlawhchhuah avang hian Liverpool hi Premier League hmahruaitu an ni mek a ni.

Liverpool hian penalty chawiin, 57mins-ah Jean-Phillipe Mateta chuan penalty spot atangin Palace hma a hruaipui a, mahse 75mins-ah Palace winger Jordan Ayew hnawhchhuah a ni. Ayew hnawhchhuah a nih hnu lawkah Mohamed Salah chuan Liverpool tana a goal 200-na hmangin Liverpool si phurh a rul a, injury time-ah Harvey Elliot chuan Liverpool chakna goal a khung.

An inkhelh zawhah German manager Klopp chuan, “Manager hlim tak ka ni a, kan vannei tih pawh ka hria. Kan khelh that chang chauha kan chak chuan hlawhtlinna chance a awm lova, Palace lakah khan kan khel tha lem lo.

“76mins chhung kha kan khel chhe hle a, kan khel khan mu leh mal a nei lo. Mahse 76mins hnu atanga a tawp thleng kha chuan player 10-a khel an ni bawk nen kan chhaih buai viau a, game kan thlak danglama, kan substitute te an pawimawh hle,” tiin inkhel a hmuh dan a sawi a ni.