12 Jul 2019 01:39

bakteaJr.

Mizo tlangval

​Kan vaiin Lampard kan hmangaih – Azpilicueta

Chelsea captain Cesar Azpilicueta chuan an manager thar Frank Lampard chu Chelsea chhungkuain an hmangaih vek thu a sawi a, a chungah rinna an nghah thu leh kawng tinrenga puih an tum thu a sawi.

Chelsea chuan nikum nipui laia an lakluh Italian manager Maurizio Sarri chu Juventus lamah kal tirin kum khat chiah manager hna la thawk; an player hlui Lampard chu Derby County atanga lalutin tun thla atang khan an ruai tan.

Lampard hi Chelsea player hlui a nih thu leh footballer a nih laia a that zia leh hlawhtlin zia chu sawi ngai a ni tawh lova, management lamah erawh kum khat bak tawnhriat a la nei lo.

Azpilicueta chuan, “Season liamta khan Derby inkhel kha ka en zeuh zeuh thin a, chu mai ni lovin Frank nen hian dressing room khat kan lo hman tawh thin avangin player a nih thinnaah khan ka hre chiang em em a, tun kar khan khel tura min duhdan te pawh ka hrethiam nghal a ni.

“Chelsea-ah Frank hian hun rei tak; hun hlawhtling tak a hmanga, chuvang chuan nitin mai hian hma kan sawn a ngaih zia a hrechiang. A chang chuan chak loh tum a awm thin a, mahse hma lam pana kal zel hi kan duh. Tunah chuan Frank hi kan manager a ni a, a hnung kan zui zel dawn.

“Frank hian manager angin kum khat bak hun a la hmanga lova, mahse football lama a tawnhriat hi kan hre chiangin, manager tha ber ber hnuaiah a lo khel tawh a, kan tan chuan lungngaihna tur eng mah a awm lo. Chelsea manager nih hi thinlung takin a duh a, he club hi a hmangaihin, keini lam pawhin kan vai mai hian kan hmangaih a ni,” a ti.

Sawi belhin Azpilicueta chuan, “Frank hian player naupang lamte tan inkhelhna hun tha pek a tum em em a, senior player-te pawh min ti phur a, player naupang zawkte hi an vaia puih kan tum dawn a ni. Frank hian kan player naupangte hi a hrechianga, a staff-te pawh hian player naupang enkawl dan an hre chiang hle. England-ah academy tha ber kan nei a, player naupangte tan hian an theihna lan chhuah tirna hun a inhawng mek a ni,” a ti bawk.