Kar liamta khan Leeds United- in Derby County an tlawh hma lawkin Leeds mi leh sa pakhat chu Derby County training ground-ah hmuh a ni a, police-te inrawlhin, he ‘spy’ hi lak kian a ni a, Leeds leh Derby inkhelh zawh hian he thil thleng avang hian Leeds chuan Derby lakah thupha an chawi nghe nghe.

Leeds manager Marcelo Bielsa chuan a coaching staff zinga miten tun season tluana an team tum turte training lai an enthlak ziah thu a sawichhuak. Bielsa hian an tum tur team-te training lai enthla tura mi a tirh ziah thu leh phalloh thil a nih lo h thu a sawi.

Bielsa chuan an tum turte an enthlak ziah thu sawiin, “Ka chet dan avangin mi tam takin ngaihdan an nei tawh a, mi tam takin ka chet dan an dem bawk. Thil dik leh mawi a ni lo ti a min dem tu pawh an tam hle. Kan tum turte kan enthla ziaha , kan khelhpui hma in an training neih dan zawng zawng ka thlithlai ziah bawk.

“Ka thil tih hi thil phalloh a ni hran lova, kan sawi hova, thil dik leh mawi ni lo mahse dan bawhchhiatna a ni hran lo. Thil phal zawng zawng hi tih vek a tha kher lo tih pawh ka hria a ni,” a ti.

EFL lam chuan Bielsa leh Leeds hi chhui an tum meka, mahse Bielsa a zam lova, an thil chhui chu tih awlsam sak a tum thu a sawi bawk. Bielsa chuan, “EFL tan hian thlil ka ti awlsam dawn a, ka chet dan pawh ngun taka an en ka beisei bawk. An thil chhui hi tih awlsam sak ka tum ber. Ka dinhmun leh ka chet dan hi thil dang nen khaikhin ka duh lova, midang va beih nana hman pawh ka duh lo. Mahse ka thil tih hi thil phalloh a ni lova, khap pawh a ni hek lo,” a ti bawk.

Leeds hian an manager awmdan avangin thu pha an chawi thu hi thuchhuah an siam a, Leeds neitupa Andrea Radrizzani chuan Derby County neitupa Mel Morris chu hmaichhanah ngei ngaihdam a dil thu an tarlang a ni.