26 Mar 2020 04:51

inkhel

Kan tha e: Paulo Dybala

Paulo Dybala chuan Juventus tantute hnenah a bialnu Oriana Sabatini nen coronavirus an kai hnuah an tha chho zel tih a sawi.

Kum 26-a upa Juventus forward Paulo Dybala te chu ni li kal taah khan coronavirus kai a ni tih an finfiah a, hei vang hian an chenna inah inkhung hrang tura tih an ni a. Tunah chuan hma an sawn tawh thu leh an that chhoh zel thu a rawn sawi der tawh a ni.

Dybala chuan Instagram lamah March 21 ah khan COVID-19 a kai a ni tih a puangzar tawh a, hetah bawk hian a thlalak dahin, “Kan tha e (Estamos bien)” tih a dah tel bawk a ni.

Juventus chu Italy rama club zingah chuan an player positive hmuh chhuah hmasak ber niin, Daniele Rugani chu tunlaia hri leng mek kai finfiah hmasak ber a ni a, a hnuah Dybala chu an finfiah ve leh a ni.

An forward a positive a ni tih an hriat hnuah club chuan thu chhuah an siam a, “Paulo Dybala leh Oriana Sabatini te chu March 11 (Nilaini) atang khan anmahni duh thuin an chenna inah an inkhung hrang nghal a. Ngun taka enkawl a ni zel ang a, a dinhmun pawh kan ngaihven reng dawn a. Tunah chuan hma a sawn hle a, a tha chhuak leh vat turah kan ngai,” an ti.

Dybala hi Juventus player zingah chuan coronavirus kai pathumna niin, defender Daniele Rugani leh midfielder Blaise Matuidi te chuan a hmain an lo kai tawh a ni.

A inkhung hran hnuah Dybala chu a rilru tizangkhai thei turin social media lamah a phusa zui hle a ni.

Italy ram chu tun dinhmunah coronavirus vanga buai ber pawl an ni mek a, he hri leng hi mi 74,000 chuang zetin an kai tawh a, tun dinhmunah mi 7,500 chuang zette chuan an thih phah tawh bawk a ni.