15 Mar 2019 09:56

inkhel

​Kan tan Giroud a pawimawh – Sarri

Chelsea chuan Europa League Round of 16-ah aggregate-in Dynamo Kyiv chu 8-0 in an hneh a, Quarter-final an lut.

Chelsea hi second leg inkhelah 5-0 laiin khual mualah an chaka, Blues tan hian France striker Olivier Giroud chuan hattrick a siam. Giroud hian perfect-hattrick a siama, a ke veilam leh dinglama a khung bakah a lu in a khung bawk.

Chelsea-in Gonzalo Higuain an lakluh hnuah Giroud hian inkhelhna hmun a chang tam tawh lo hle a, Europa League-ah erawh manager Maurizio Sarri chuan a khelh tir fo va, goal pawh a khung thei hle.

Sarri chuan Giroud chu an tana a pawimawh thu sawiin, “Giroud hi khelmual a luh piangin a khel tha thin em em a, Europa League-ah hian goal kua a khung tawh. Kan tan Giroud hi a pawimawh hle a, hattrick a siam hi ka lawmpuia, a chungah hian ka lawm em em bawk a ni,” a ti.

Sarri chuan inkhel chungchang sawi zuiin, “Bul kan tan tha a, khatiang taka bul tan kha kan duhdan a ni a, Stamford Bridge-a kan result neih zawh chiah hnuah goal kan khung kha kan tan a pawimawh zual.

“Minute nga hnuah goal kan khung thei a, kan tumpuite kha dinhmun khirh takah an awm phah. First half-ah kan khel tha zual em em a, second half-ah pawh kan khel tha in result tha tak kan nei a ni,” a ti bawk.