18 Oct 2020 12:06

bakteaJr.

Mizo tlangval

Kan season a intan ta chiah e: Solskjaer

Manchester United chuan Premier League inkhelah Newcastle chu St James’ Park-ah 4-1 in an hneha, hnehna an chan hnuah an manager Ole Gunnar Solskjaer chuan an season a intan ta chiah niin a sawi.

United hian season bul an tan tha lem lova, khelh liah vawi hnih chakin vawi hnih an tlawm tawha, point 6 nei mekin, 14-naah an awm.

Newcastle lakah United hian Luke Shaw own-goal hmangin si an phur hmasa a, mahse captain Harry Maguire chuan an si phurh a suta, hun tawp dawnah United vawi thum goal khung belhin, point thum an hlawhchhuak.

United hian Newcastle an tum hma chiah hian 6-1 laiin Tottenham chu Old Trafford-ah an hneh lova, Newcastle lakah erawh an khel tha thawkhata, goal attempts 28 lai an nei nghe nghe.

Solskjaer chuan, “Kan result hnuhnung ber avang khan he game hi kan tan a pawimawh zuala, chutah minute hnih hnuah si kan phura, kan tan a ti hautak zual hle.

“Mahse kan tumruhna a langa, si phur hmasa mah ila tha takin kan hmachhawna, midang fuih phur thei tak captain-in min hruai bawk.

“Chhuanlam neih kan duh lova, mahse pre-season kan mamawh. International break kha point tam zawk nen thlen pawh duh mah ila kan thei ta lova, tunah erawh kan season a intan ta chiaha, game pawh kan man chho tanin ka hria.

“Ka naute an khel thaa, game lian tak tak kan khelh chhoh a ngai dawna, game tin mai hi phur takin an thlir thin. Tlema zawng ka hahchawlh tira, a hnuah an rawn luta, danglamna an rawn thlen,” a ti.