Interim manager Ole Gunnar Solskjaer-a hnuaiah Manchester United chu a vawikhat nan an tlawma, Champions League Round of 16 first-leg inkhelah Paris Saint-Germain chu si hnih faiin an hneh lo.
PSG an hneh loh hma hian United an kaltluang hle a, game 11 khelin vawi sawm an chaka, vawikhat an tumpui an inhnehtawkpui bawk. PSG lakah erawh an che hleithei lova, Solskjaer ber pawhin PSG chu United tana an la san mah mah thu a sawi zui nghe nghe.
United hian PSG hneh lo mahse an mangang lo niin Solskjaer chuan a sawi a, an khelh hmabakah pawh an zam dawn lo niin a lang. Solskjaer chuan, “Game khat chak loh avangin kan mangang lo. Engmah a danglam phah lova, kan rilru puthmang pawh chhete mahin a danglam lo.
“Kan khelh duh dana kan khelh zel a ngai a, kan khelh dan hi attacking lam hawi zawng a ni zel ang. Chelsea-ah kan kal dawn a, Liverpool kan lo mikhual dawn bawka, kan nihna lantir kan duh. Team dangte pawhin player inhliam an nei nual hlawma, insiamrem a ngai a ni,” a ti.
Solskjaer-a sawi ang hian United chuan FA Cup 5th round inkhelah Chelsea chu Stamford Bridge-ah an luhkhung dawn a, Liverpool chu Premier League-ah an mikhual bawk dawn. An player pawimawh pahnih Jesse Lingard leh Anthony Martial-te chu an inhliam avangin kar thum tal an chawlh a ngai dawn a, anni hian Chelsea leh Liverpool an hmachhawn thei dawn lo chiang tawh a ni.