Sunday zan khan Premier League inkhelah Tottenham chuan Aston Villa an lo mikhual a, an mualah Tottenham hi 2-1 in an tlawm.

He inkhelah hian Tottenham tan Giovani Lo Celso chuan goal a khung a, Villa tan hian Pau Torres leh Ollie Watkins te chuan goal khat ve ve an khung bawk.

An inkhelh zawhah Tottenham manager Ange Postecoglou chuan, “Kan duh ang result a ni lova, mahse ka naute khelh danah ka lawm hle a, ka chhuang em em a ni. Khelh that deuh deuh chang kan nei a, tum dang chu nise nuamsa takin kan chak maithei. Ka naute inpekna leh theihtawp an chhuahna kha keichuan ka hmuh hmaih lo,” tiin a sawi.

Tottenham hian player inhliam an ngah hle a, Villa lakah pawh hian tun season tir lama khel tam lo khel an awm nual. Lo Celso chuan 22mins-ah Spurs hi hma a hruaipui a, mahse half time hma lawkin Torres chuan Villa si phurh a rul a, 61mins-ah Watkins chuan Villa chakna goal a khung.

North London club hian season bul tan tha hle mah se, tunah erawh a zanwin vawi thum an tlawm mek. Tun season-a an game hmasa sawmah Spurs hian tlawm nei lo mah se, tunah hian top 4 pawnah an awm tawh a, Aston Villa hian an rawn lehpel tawh.

Khelh 13 atangin Tottenham hian point 26 hlawhchhuak tawhin panga dinhmun an luah mek a, palinaah Villa awmin, Villa hian khelh 13-ah point 28 an nei a ni.