England chuan Pathianni an khan Euro 2024-a an game hmasa ber an khel a, si khat faiin Serbia an hneh a, goal awmchhun hi Real Madrid midfielder Jude Bellingham khung a ni.

First half khel zia viau mah se, Gareth Southgate leh a hote second half lamah an talbuai ve, Serbia-in nasa takin an nawr a, goal an chhuah lo chauh a, an vannei thawkhat hle.

An khelh dan chungchanga kum 20 mi Bellingham chuan, "Kan khel tha tawk lo. First half-ah goal kan khung thei a ni tih kan lantir a, second half-ah goal kan venghim thei a ni tih kan lantir bawk.

"Kan khelh danah duhthusam lo lai chu a awm alawm, mahse thil tha lam sawi tur erawh a awm teuh a nia. Goal kan venghim a, goal kan khung a, point thum kan hlawhchhuak, thil tha tak a ni.

"Kan squad hi kan naupang tlang a, kan la khel ho tam lo bawk, chutih lain kan inngeih tlang em em. Kan khelh danah duhthusam lo lai chu a awm, mahse a pumpuia thlirin kan khelh danah kan lawm thawkhat hle," tiin a sawi.

Minute 13-naah mual dinglam sir atangin Saka chuan ball a vawrh lut, a laiah Bellingham a rawn inkhawh lut a, a tauh goal mawi hle. Goal awmchhun khungtu Bellingham chu Southgate chuan a fak.

"Kan khelh danah ka lawm thawkhat hle, a bikin first half-ah kan khel tha a, ball kan thunun bawk.

"Second half-ah ball kan chang tam lo deuh a, mahse kan chak a, bul tha takin kan tan e.

"Bellingham hian ama chanchin a ziak chho zel. Box chhunga a tlan luh hun te kha a fuh khawp mai, goal kan khung dawna kan khelh dan kha a mawi lutuk," tiin Southgate chuan a sawi.

Ninganiah England chuan Denmark an hmachhawn ang , June ni 25-ah Slovenia an hmachhawn ang. Denmark leh Slovenia te game hmasa berah 1-1 in an inhnehtawk a, point 3 hlawhchhuak awmchhun England dinhmun a tha hle.

Midfielder nei nual mah se Gareth Southgate chuan Trent Alexander-Arnold chu Serbia an hmachhawn tumin midfield-ah a chhawr leh.

Mi tam takin TAA a khel tha tawk lo niin an ngai a, midfielder pangngai nei nual chunga midfield-a defender a chhawr chu England boss Gareth Southgate an sawisel nasa hle.

Hetih lai hian Southgate chuan TAA khelh danah a lungawi thu a sawichhuak.

"Trent Alexander-Arnold khelh danah ka lawm thawkhat hle. Trent kha a tlan kual zau em em a, a khelh thanna a ni lo tih chu kan hre vek.

"Discipline tha takin a khel a, pass tha tak tak a nei a, goal-ah shot a nei bawk. Kan enchhin mek a, player naupang emaw tawnhriat nei lo emaw, a tu ber nge kan chhawr dawn midfield-ah tih kan ngaihtuah mek.

"Trent kan enchhin a, tha takin a khel thei a, a lawmawm khawp mai," tiih England boss chuan a sawi.