22 Nov 2020 11:20

bakteaJr.

Mizo tlangval

​Kan inphahhniam zel a ngai: Lampard

Chelsea chuan Inrinni zan Premier League inkhelah, Newcastle an tlawha, mikhual lam Chelsea hian si hnih faiin hnehna an chang.

Chelsea tan hian Tammy Abraham chuan goal a khunga, Newcastle player Federico Fernandez a own-goal bawka, London club hian point 3 hlu tak an hlawhchhuak.

Chelsea hi tun gameweek-a inkhel hmasa ber an ni a, hnehna an chan hian hmahruaitu an ni zuaia, Chelsea hi che tha chho viauin, a zawnin game 12 chhung chak loh an nei tawh lova, a zawnin Premier League-ah game 7 chhung hneh loh an tawng tawh lo.

Inkhelh zawhah Chelsea manager Frank Lampard chuan, “Minute nga chhung league table lerah kan awma, a lawmawm rualin, zau zawka thil thlir a ngai. Hma kan sawn tih kan hriat rualin, tihtur kan la nei tih pawh kan hai lova, kan chapo loh a, kan inphahhniam a ngai a ni,” a ti.

Newcastle lakah hian Chelsea tan Timo Werner a khel tha hle a, goal khung lo mahse a hlauhawma, Abraham-a goal hi Werner-a assist leh a thawhrah liau liau a ni.

Lampard chuan an German forward Werner chungchang sawiin, “Chance tha tak tak a nei a, mahse a chang chuan khung vek theih a ni lova, mahse Newcastle lakah erawh lehlam tan a hlauhawm tluan zak a ni.

“A quality ang nei player hi chak tur chuan kan mamawh a, ball a tlan chakpui theih dan em em pawh hi a mak zawk. A selfish lo em em a, ani ang world-class player hi chu innghahna tlak an ni,” a ti bawk.

Chelsea hi season tirah bul an tan tha lem lova, an tlarhnung lam a phui lo viau. Tunah erawh an tlarhnung a phui tawh hle a, goalkeeper Edouard Mendy an lak hnuah, Mendy hian Chelsea tan competition zawng zawngah game kua khel tawhin clean-sheet pasarih a nei tawha, Premier League bikah clean-sheet pali nei tawhin, Premier League keeper zinga clean-sheet ngah ber a ni mek.

Sawi zelin Lampard chuan, “Kan dinhmuna awm hi a nuama, clean-sheet atang te hian inrintawkna pawh kan nei chho hle a, tun season tir lam leh season hmasa lama kan buaina niin, chutih rualin hmasawn tuma kan beih zel a ngaia, consistent taka kan khelh a ngai.

“International break zawha nikuma kan hneh loh kan hneh thei hi a lawmawm hle a, possession pawh kan thununa, goal kan khunga, a bak pawh khung belh thei kan ni,” a ti.