Kan hah – Lampard

19th August 2019, 08:08AM

Chelsea chuan tun season-a an Premier League game pahnihna an khela, Stamford Bridge-ah Leicester City chu 1-1 in an lo inhnehtawkpui.

Chelsea hian tun season-ah game thum an khel tawh a; Premier League game hnih bakah kar laihawl khan UEFA Super Cup khelin Liverpool an hmachhawn bawk. Chelsea hian ni riat chhungin game thum an khela, eng emaw chenah player-te pawh an chauh deuh a rinawm.

Chelsea manager thar Frank Lampard chuan Leicester laka second half-a an che chhe deuh chu an hah vang niin a sawi. Lampard chuan, “Kan hah tih chhuanlama hman hi ka duh lo; mahse second half-ah kha chuan kan hah avangin duh angin kan khel thei lo.

“Nimin khan Liverpool inkhel ka hmu a, harsa an tih ve zia pawh ka hmu. Minute 120 chhung kan inkhela, a tukah Istanbul atangin kan rawn thlawk haw leh nghal bawka, game a rei deuh hnu kha chuan keimahniah nghawng a nei chiang hle bawk.

“An chauh avangin ka player te hi ka khawngaih hle a,mahse chu chu chhuanlama hman erawh ka duh lo,” a ti.

Chelsea hian sawi tawh angin Sunday-a Manchester United an khelh hnu lawkah kar hmasa khan Super Cup khelin Liverpool an hmachhawn leha, hun pangngaia chak zawk an awm loh avangin Super Cup-ah hian 120mins zak an khel leh bawk a ni.

Copyright © inkhel.com 2024. All rights reserved.