​Kan football kan khel – Sarri

15th February 2019, 06:02PM

Europa League knock-out stage first-leg inkhelah Chelsea chuan Swedish club Malmo an luhkhunga, Chelsea hi 2-1 in an chak.

Inkhel zawhah Chelsea manager Maurizio Sarri chuan an football an khel niin a sawi. Tun hnaiah Sarri hian Chelsea hi a chet that pui lem lova, Premier League table-ah pawh paruknaah awmin, English team lian paruk zingah an hniam ber.

An chet chhiat chhanah Sarri hian a palyer-ten a football duhdan an khel lo niin a lo sawi tawh thina, Malmo lakah erawh a lung a awi thawkhat niin a lang. Italian boss chuan, “Malmo lakah kan football kan khela, mahse kha ai khan ball kan tih chet nasat deuh chu a la ngai.

“Dik taka kan khelh a ngai a, kan rilru puthmang a dik tawk loh chuan England-ah chuan game thum emaw game lo vel a chak loh phah theih. Kan khelh that reng a ngai a, thil awlsam nilo mahse kan tum a ngai a ni,” a ti.

“Malmo lakah khan kan inringtawk em em a, chu chuan min ti lawm. Kan match hnuhnung bera kan result neih atang kha chuan inring tawk taka khelh chu thil harsa a ni. Kan khel tha a, set-piece ah bak lehlamin chance an nei lo. Goal hnih aia tam khung thei kan niin ka hria a, mahse kan tihsual avangin goal khat kan chhuah.

“Kha aia nasa khan kan chak theia, goal khung theihna hun tha vawi thum emaw vawi li vel kan nei. Khatiang taka inrintawkna neih kha thil awlsam a ni lo,” a ti bawk a ni.

Copyright © inkhel.com 2024. All rights reserved.