​Kan fixture a hautak, midang pawh a hautak ve tho: Lampard

15th July 2020, 05:07PM

Chelsea chuan an inkhel hnuhnung berah Norwich City chu si khat faiin Stamford Bridge-ah an hneha, season thara Champions League khelh an tumna kawngah point 3 pawimawh em em an hlawhchhuak.

Chelsea hi pathumnaah an awm meka, khelh hnih chiah Premier League-ah nei tawhin, champion fel tawh Liverpool leh Wolves an la hmachhawn dawna, an hma a ko angreng viau.

Norwich an hneh zawhah Lampard chu top 4-a an awm tluan theih leh theih loh tur zawh niin, Lampard chuan, “Sawi a har hle a, kan khelh hmabak te a hautak tih kan hria a, mahse midang zawng pawh an fixture a hautak ve tho. Premier League a ni miaua, a awlsam thei lo.

“Point thum hi lawm takin ka la dawna, keimahni kan inen let anga, tun kara team dang te inkhel kan en ang. Kan rilru kan pekna ber erawh weekend-a FA Cup semi-final kan khelh tur a ni a, chuvang chuan hna erawh kan ngah hle.

“Kan nervous tlanga, mahse a awm ka ti a, Norwich lakah khan second half tir lamah kan khel a muang deuha, mahse a hnu kha chuan kan ball inpek te pawh a tha chho leha, kan khel chhe lova, mahse hma kan la sawn thei chiang a ni,” a ti.

Copyright © inkhel.com 2024. All rights reserved.