Barcelona defender Gerard Pique chuan Osasuna laka hnehna an chan zawh loh hnuah Barcelona dinhmun chu a derthawng hle niin a sawi.

Sunday zan khan La Liga inkhelah Barcelona hian Osasuna an tlawh a, Barcelona hi an chak zo lova, 2-2 in team hnihte hi an inhnehtawk.

Barcelona hian season an hmang tha lo hle a, tunah hian La Liga-ah pariatna niin point 18 laiin league hmahruaitu Real Madrid an pha tawh lova, Champions League lamah group stage an paltlang zo lo bawk.

Barcelona hian player naupang an chhawr nasa hle a, Osasuna laka goal khungtu te pawh hi Ez Abde leh Nico Gonzalez te niin, anni hian Barcelona tana an goal hmasa ber ve ve an khung a ni.

Pique chuan, “Hun thar kan kai mek a, mahse he hun thar kan kai mek pah hian league lamah point thum kan hlawhchhuah tel a ngai. Chu chu a pawimawh hmasa ber a, a chung lama awm te nen kan inkar kan tihzim a ngai hle.

“Kan result a tha lo hle a, kan game khelh leh turah tum fel tak kan neih a ngai a, thui tak dawn theih a ni rih lo. Nakin zelah erawh tuna kan player naupang te hi an rawn tha dawn hle tih a lang a, chutih rual chuan result tha kan neiha, hnehna kan chan mawlh mawlh a ngai a, a hmanhmawhthlakin kan dinhmun hi a derthawng hle a ni,” tiin a sawi.