Juan Mata chuan season liam taah an che tha tawk lo tih sawiin, season tan leh hunah chuan a hma zawng aia an chet that tur thu a sawi.

Manchester United midfielder Juan Mata hian tun hnaiah a contract a pawt sei leh deuh chiah a. A hmaa an club chet dan chu duh angin a tha tawk lo tih a pawm thu a sawi chhuak a, tun atang chuan tu te pawhin theihtawp chhuah theuh a tul thu a sawi bawk a ni.

Mata chuan, “Season kan hman zawh takah khan duh angin kan che tha lo tih chu kan hre vek a. Kan hun hman liam tak atang khan hma kan sawn viau a ngai tih a chiang reng a. Season tan leh hunah chuan theihtawp kan chhuah ngei a ngai dawn a ni,” a ti.

“Premier League boruak hi kum tinin a san belh tial tial a, club hrang hrangte pawh kan inthlau lo telh telh a ni ber a. Club tin deuh thaw chuan player tha tak tak an lei belh zel a, tu tan mah inthlahdah theih a ni lo a, hawi sang lutuk a awm theih loh hrim hrim,” a ti bawk.

A sawi zelnaah, “Keini club pawhin nasa taka tan kan lak a ngai dawn a, player te mai bakah staff te thlengin theihtawp kan chhuah tlan vek a ngai a. Tih tak zeta kan beih chhoh chuan a hma zawng aiin kan che tha ngei dawn a ni,” a ti.

Pathianni khan Singapore khawpuiah Adidas chuan hun an buatsaih a, hetah hian Juan Mata hian hetiang thu hi a sawi chhuak a. Paul Pogba, David de Gea leh Aaron Wan-Bissaka te pawh he hunah hian an tel a ni.

United chuan International Champions Cup an khelhah Inter Milan an hmachhawn a, Mason Greenwood goal thun hmangin Premier League club hi 1-0 in an chak a ni.

Ole Gunnar Solskjaer leh a pawlte hian Premier League team dang Tottenham Hotspur chu China rama Hongkou Stadium-ah an hmachhawn leh dawn a, hemi hnuah hian AC Milan nen an inkhel leh dawn bawk a ni.