Manchester United chuan Champions League Quarter-final second leg inkhelah Barcelona chu Camp Nou-ah si thum faiin an hneh lova, Champions League atangin an tla.
Old Trafford-ah Barcelona hi si khat faia an chak tawh bawk avangin aggregate-ah 4-0 in Barca hi an chak a, semi final an lut. Second-leg inkhelah Manchester United hian bul an tan tha a, inkhel tan tir teah Marcus Rashford chuan goal bar a pet per nghal.
Rashford hian a hun tha neih hi goal-ah chan tir thei sela chuan inkhel hi a danglam ngeiin a rinawm a, mahse a tir lamah United an hlauhawm tih loh chuan Barca hian inkhel an thunun tluan a ni deuh ber tawh.
Second-leg ah hian Messi chuan goal hnih a khung bakah Philippe Coutinho chuan goal khat a khung ve bawk. Messi goal hmasa zawk a pui hle a, Ashley Young-a chet buai a chhawr tangkai. Messi-a goal hnihna hi David De Gea thiam loh a ni a, Coutinho-a goal luh dan pawh midfield-a United fimkhur tawk loh vang a tih theih awm e.
United manager Ole Gunnar Solskjaer chuan an hun tha neih an hman tangkai tawk loh thu sawiin, tihsual neih a thian loh thu a sawi bawk. Solskjaer chuan, “Heti ang game pawimawhah tawh chuan tihsual neih a thiang tawh lova, tihsual neih chu sawi loh kan hun tha neih apiang kan hman tangkai a ngai tawh zawk.
“Bul kan tan that kan chhawr tangkai lo em em a, goal zawna an pet hmasak ber pahnihah goal an rawn thun zui bawka, inkhel a tawp a ni ber. Tun hun thleng tur hian kan khel tha thin a, mahse Barcelona lakah erawh kan danglamna a lang. An finishing kha a tha turu hle a ni.
“Inkhel bul kan tan tha a, a tir minute 15 chhung vel kha chuan eng emaw ti thei niin kan lang, mahse minute li chhungin goal hnih an khunga engkim a harsat phah a ni,” a ti.
Messi-a chungchang sawi zuiin Solskjaer chuan, “Player tha chungchuang a ni a, ani leh Cristiano Ronaldo hi tun kum sawm liamta chhunga footballer tha ber an ni. Kan lakah pawh Messi chuan player ropui a nih zia a lantir nawn leh. Eng ang pawhin inbuatsaih ila hmun awl kan siam sak a, hun tha kan pek hlek chuan goal a khung ngei dawn a ni,” a ti.