​Kan beisei loh title race

09th December 2019, 01:12PM

Premier League-ah khelh 16 khelh a ni tawh a, London club pahnih Arsenal leh West Ham te chiah khelh 15 la khelin, anni hian an game 16-na chu zanin zanlai dar 1:30-ah khel ve dawnin Arsenal hian Hammers an luhkhung ang.

Khelh 16 khelh a nih hnuah Liverpool chu hmahruaitu an ni chiang hle a, an dawtah beisei loh Leicester awmin, pathumnaah season tira champion tura rinkai ber leh champion lai ni bawk Manchester City awmin, palinaah Frank Lampard leh a naute an awm ve bawk.

England-a team lian zual zingah Manchester United, Tottenham leh Arsenal te an che tha tawk lo hle a, an zinga Arsenal hi che chhe falin game kaw chhung ngawt competition hrang hrangin an chak zo tawh lo.

Hmahruaitu Liverpool hian khelh 16 atangin point 46 ngawt an hlawhchhuak tawha, Old Trafford-ah Manchester United an inhnehtawkpui tih loh chuan point hloh eng mah la nei lovin vawi 15 lai an chak tawha, an hnuai chiaha awm Leicester aiin point 8 laiin an sang zawka, an elpui tur bera ngaih Manchester City aiin point 14-in an sang zawk tawh bawka, Liverpool hi champion tura rinkai ber an ni a tih loh theih tawh loh.

Season liamta khan City leh Liverpool chiah an inuma, a tawpah City hi point 98 hmu in an champion a, pahnihaah Liverpool awmin point 97 lai an nei ve bawka, Premier League chanchina title race bawn ber a nih loh pawhin bawn ber zinga mi a ni chiang hle.

Tun season-ah Liverpool chu beisei phak bakin an che tha a, an che that chu beiseiawm sa mahse beisei phak bakin an che tha a ni ber. City hian rin aiin Liverpool an inelpui thei lo bawka, mahse beisei loh lamah Liverpool umtu an rawn chhuak ta tlat mai le! Chu chu Premier League-a lo champion hlawl tawh Leicester City an ni.

Leicester hi tunah hian a zawnin Premier League-ah game riat chhung an chak zawn tawha, an club chanchina thil la thleng ngai lo niin, khelh 16-ah point 38 hlawhchhuak tawhin, Liverpool hnaih ber tu an ni a, champion lai City aiin point 6-in an sang zawk bawk. Leicester striker Jamier Vardy chu tun season-ah rawn che tha leh pek hle in tunah hian league-ah goal 16 lai a khung tling tawha, top scorer ni mekin a dawt chiaha awm Tammy Abraham chuan goal 11 a khung tawha, an inthlau angreng hle.

Leicester hi season hmasa khan an che tha tawk lova, an manager rawih lai banin Celtic atangin Brendan Rodgers chu an manager thar atan an lalut. Rodgers hian kumin February ni 26 atang khan Foxes hi enkawl tanin, a chet that pui nghal hle a, Rodgers an rawih atanga chhutin Premier League club zingah Leicester aia point hlawhchhuak hnem hi Liverpool leh Manchester City bak an awm lo.

Leicester hian tun season vawi 12 hnehna an chang tawha, vawi hnih tlawm tawhin vawi hnih an tumpuite an inhnehtawkpui tawh bawk. Sum nei lo an ni hran lova, club neitute an phur thar a nih ngat phei chuan January thla bazaar inhawn hunah an squad an tih chhah belh ngei a rinawma, season tawp thlengin Liverpool umtu ber an ni mai lovang tih a sawi theih hauh lova, tun season-ah kan beisei loh title race kan hmu chho zel dawn niin a lang mek a ni.

Copyright © inkhel.com 2024. All rights reserved.