​Kaithar lakah champion lai City an tlawm

15th September 2019, 05:09AM

Season hmasaa point 98 hmua Premier League-a champion Manchester City chuan kaithar Norwich chu tlawhin tun season-a an game ngana an khel a, City hi kaithar Norwich lakah 3-2 a tlawmin, 'upset' pui tak kan hmu.

Mual neitu lam Norwich tan Kenny McLean, Todd Cantwell leh Teemu Pukki-te chuan goal khat theuh an khunga, City tan hian Sergio Aguero leh Rodri –te chuan goal an khung ve bawk.

City hian khelh nga atangin point sawm an hlawhchhuak tawha, pahnihnaa awmin, hmahruaitu Liverpool chu point nga in an pha lo mek. Norwich hian khelh ngaah point ruk hlawhchhuak ve tawh bawkin, 12-naah an awm mek a ni.

Norwich 3-2 Manchester City

( McLean 19', Cantwell 29', Pukki 50' ) ( Aguero 45', Rodrigo 88' )

Player Ratings

Norwich: Krul 7, Byram 8, Godfrey 7, Amadou 7, Lewis 7, Tettey 7, McLean 8, Buendia 9, Stiepermann 7, Cantwell 7, Pukki 8.. subs: Srbeny N/A, Drmic N/A.

Man City: Ederson 6, Walker 5, Stones 4, Otamendi 4, Zinchenko 5, Rodri 6, D Silva 6, Gundogan 5, B Silva 6, Aguero 5, Sterling 6.. subs: Mahrez 5, De Bruyne 6, Jesus 5.

Match Report

Inkhel tan a ni a, team hnihte khel a hmuhnawm dun viau a, kaithar Norwich pawh champion lai City lakah an tal thei viau. Kaithar ni mahse Norwich chuan an theuneu loh zia an lantir a, 18mins-ah hma hruaiin corner atanga ball vawrh luh chu midfielder McLean chuan mawi takin goal-ah a lo head lut. Hemi lawk hian Raheem Sterling chuan chance a nei a, goal-ah ball chhuih mahse khawih per sak a ni a, hlauhawmah a chhuak lo.

27mins-ah Sterling chuan box pawn atangin far post lama inpawt Sergio Aguero chu a kangin ball a pe a, pass tha tak ni mahse Aguero tan a rem tawk loh avangin Argentine forward hian goal-ah a tauh lut thei lo. Hemi hnu chiah hian Norwich in goal an khung leha, Pukki chu ball pek niin, ani hian City box chhungah ball a khalh luta, a thlanga awm Cantwell pe in, Cantwell hian goal-ah a lo chantir a, 2-0 in kaithar Norwich chuan champion lai lakah hma an hruai.

Darkar chanve chuang hret khelh a nihin Sterling chuan si ban a tauh pera, an si phurh sut thenna hun tha tak a bawhpelh. Half-time hma chiahin mikhual lam City tan Aguero chuan an si phurh a pakhat a suta, Bernardo Silva cross chu Aguero hian goal-ah a tauh luta, half time hma chiahin an si phurh an sut then hman.

Second half-ah City insangmarin goal khung tum viau mahse an che hleithei bik lo. Second tir lamah chance tha nei hmasa zawk hi Norwich bawk niin, 49mins-ah Pukki chuan Buendia pass atangin goal khungna chance nei mahse goal-ah a chantir lo.

Pukki hian chance a hlah hnu lawk hian Canaries goal thumna a khung zui nghala, City defender Nicolas Otamendi inthlahdah hle in a muangchanga, an box pawn chiahah awlsam takin Buendia chuan ball a chhuhsaka, ani hian August thla Premier League Player of the Month-a thlan Pukki pe in, Finnish striker hian goal-ah a lo chantir a, tun season-a a league goal rukna a khung.

City hian point thum hlawhchhuah la inbeiseiin Norwich hi nawr viauin chance pawh insiam nasa mahse Norwich lam an duai bik hauh lova, City an nawr let ve zela, ball pawh an chang tlem bik chuang hauh lo. Hun tawp hnaih lam tak takah erawh City hian ball an chang tam chho va, 88mins-ah goal pawh an khung ta nge nge; City goal hnihna khungtu hi an player thar Rodri a ni a, box pawn chiah atangin Spanish midfielder hian mawi takin Canaries goal-ah ball a chhuih lut.

Goal an khung belh hnuah City-in beisei an nei thara, hun tlem tawh mahse point khat tal hlawhchhuah an tum hle. Injury time chhovah City lamin chance an nei tam a, mahse clear-chance erawh a vanga, Norwich an khawng hle a, 3-2 in inkhel tihtawp niin, Norwich chuan champion lai an hneh ta a ni.

Copyright © inkhel.com 2024. All rights reserved.