23 Oct 2018 09:42

inkhel

Ka thil tih hi ka hre chiang: LeBron James

LeBron James chuan Los Angeles Lakers a zawm hma khan a khawvel thar tur chu a hriat chian thu sawiin, a zawna vawi thum an chak loh chhan chu amah vang a nih thu a sawi.

Cleveland Cavaliers chhuahsanin LeBron James chuan Los Angeles Lakers a zawm a, tun season-ah vawi thum an inkhel ta a, an la tlawm vek a. An game hnuhnung berah San Antonio Spurs lakah a tawp lamah che tha viau mahse an chak zo ta lo a, an chak loh chhan chu amah vang a nih thu a sawi a ni.

Superstar forward James hian second hnih chauh a awm tawh tihin 3-pointer a thun a, hun pangngai a tawp zui a, an innihrual a. Overtime an khel a, James hian free throw vawi hnih a thun lo a, a tawpah San Antonio Spurs chu 143-142 in an chak zui a ni.

NBA season tan chhohah Lakers chuan 0-3 record an nei nghal a, bul tan tha lo hle mahse LeBron James chuan hma sawn tumin team chuan theihtawp an chhuah mek zel niin a sawi.

James chuan, “He lai hmun ka pan dawn khan eng khawvelah nge ka zuan luh dawn tih chu ka hre chiang sa a. Ram ropuia lut sa ka nih dawn loh zia chu ka hre tlang vek a, hmasawnna lamtluang zawh tur ka ni tih ka hria a, chutiang tur chuan ka rilru leh taksa pawh ka buatsaih vek a ni,” a ti.

“Hma lam pan zel tumin theihtawp kan chhuah mek a, kan che tha nghal pur pur thei lo tih pawh ka hria a. Mahse, chak hmel kan hmu thei lo chu a thinrimthlak ve thin tho mai,” a ti bawk.

A sawi zelnaah, “Kan team hi eng tikah nge kan chak ve dawn sawi theih a ni lo a, engmah ka hre lawk bik lo a. Mahse, kan khel hnem zel a, tawn hriat kan ngah belh zel a, hei hian a tha zawngin nasa takin min pui thei dawn tih erawh ka hre chiang,” a ti.