Lionel Messi chuan Pathiannia 3-0 a Eibar an hneh khan goal thunin La Liga goal 400 a thun tling ta a, hetiang zat goal a thun theih chhan chu a team-mate te vang a nih thu a sawi.

Barcelona star Lionel Messi hi La Liga ah chuan goal thun hnem ber a ni mek a, kum 59 chhung zet Athletic Bilbao player ropui Telmo Zarra record lo siam tawh, goal 251 chu November 2014 khan Messi hian a khum a ni.

Pathianni zana Camp Nou a an inkhelhin Messi hian minute 53-naah a ke veilamin goal a thun a, Barcelona chu 2-0 a hma a hruaipui bakah La Liga goal 400 a thun tling chiah bawk a ni.

Argentine forward Messi hian July thlaa Juventus pan ta Cristiano Ronaldo aiin goal 89 in a thun hnem tawh zawk a, tuna La Liga bika goal thun hnem zual 30 zinga la inkhel ve te chu Aritz Aduriz leh Karim Benzema te chiah an ni.

Tun season ringawtah Messi hian goal 17 a thun tling leh tawh a, season 10 chhung a zawnin goal 25 a thun tling thei dawn tep tawh a ni.

Messi chuan, “Goal 400 ka thun tling thei hi lawmawm ka ti khawp mai a, thil chhuan tlak deuh mai a ni a. Hei aia tam hi ka la thun belh zel theih ka beisei,” a ti.

“Thun hnem hrim hrim te, record thar siam tih vel te hi ka buaipui lutuk hran lo a, ka hmabak tihhlawhtlin zel theih hi ka tum ber chu a ni a. Inkhelh apiang hian chona thar kan hmachhawn a ni mai a, engtin nge kan chak theih ang a, engtin nge point thum kan hmuh theih ang a, engtin nge La Liga title kan lak theih ang tih hi rilruah a lian ber,” a ti bawk.

A sawi zelnaah, “Team tana tangkai thei ang bera awm ka tum thin a, goal thun mai piah lamah midang goal thun tur siamsaktu nih te hi ka tum hle thin a. A nihna takah chuan hetiang zat goal ka thun theihna chhan hi tuna ka khelhpuite leh tun hmaa ka lo khelhpui tawh thinte vang liau liau a ni a, an tel lo chuan goal 400 thun ngaihna a awm lo reng reng,” a ti.

La Liga goal 400 a thun tawh zinga a duh ber an zawh chuan Messi hian May 2005 a a goal hmasa ber kha a nih thu a sawi.

“Albacete nen kan inkhelh tumin Ronnie (Ronaldinho) khan ball min pe a, ka lo thun hlauh mai a, kha goal kha chu ka theihnghilh thei tawh lo ang. Clasico goal te hi a ropui bik em em zel bawk a, hmachhawn hautak deuh deuh Atletico Madrid, Valencia leh Sevilla te laka goal thun pawh hi a nawm dan a danglam duh bik khawp mai,” tiin Messi hian a sawi.