02 Jan 2019 02:16

inkhel

​Ka rin ai daih in Mayweather a tha – Nasukawa

Japanese kickboxer Tenshin Nasukawa leh boxer ropui Floyd Mayweather-te chu tun kar tir khan Japan-ah exhibition boxing match-ah an intum a, Mayweather hi round khatnaah a chak nghal.

Mayweather hian Nasukawa a hneh hma hian Japanese kickboxer hi vawi thum lai a hneh thlu hman. Mayweather ang bawkin Nasukawa hian hneh loh a la tawng lova, Mayweather laka a tlawm hi exhibition match a nih angin a record-ah ziah lan a ni dawn lo.

He inhnekah hian Mayweather hi pound kua laiin a rit zawka, round thum chiah inhnek tur an ni bawk. Mayweather hian he inhnek avang hian $ maktaduai 9 vel lai a hlawh rin a ni. Nasukawa chuan an inhnek chungchang sawiin, “ Kan in hnek tur tih chian a nih atang khan ka hlim em em a, mahse kan inhnek zawhah erawh keima chungah hian ka lawm lo hle, a chhan chu kha ai khan ka tha tih ka inhriat vang a ni.

“Mahse ka chak loh hi ka pawma, ka hmaa chona awm apiang chu ka hmachhawn zel ang.Ka thawhrim tawk loh zia ka inhriat phaha, ka chak lohna in zir nan hmangin hmalam pan nan ka hmang dawn a ni,” a ti.

Nasukawa chuan sawi zelin, chak loh mahse inchhirna a neih loh thu a sawi a, Mayweather chu a rin aia a that thu a sawi bawk. Kum 20 mi chuan Nasukawa chuan, “He fight zawrh ka nih tirh hian inngaihtuah buai lovin ka pawm nghala, ka dam chhungin hetiang ang hun tha hi ka nei leh mai mai tawh dawn lo tih ka inhria.

“Kan weight class leh thil hrang hrangah inang lo hle mah ila, ka hmaa chona awm chu hmachhawn zel ka duh a, inchhirna pakhat mah ka nei lo. Kan inhnek zawh kha chuan Mayweather lo ripui zia hi ka hrechhuak thara, ka rin ai daihin a tha a, Mayweather-a level anga awm ve ngei hi ka tum dawn a ni,” a ti.

Mayweather hi kum 41 a ni tawh a, boxing chawlhsan tawh mahse kum 2017 khan mixed martial artist huhang ngah taka Conor Mcgregor hnek turin a lo kir a, Mcgregor a hneh atanga kum khat leh a chanve vel hnuah exhibition boxing match khel tur hian a lo kir leh a Nasukawa a hneh leh ta  ni.