12 May 2020 05:48

inkhel

Ka rawn let leh e: Mike Tyson

Mike Tyson chuan hun rei tak inhnek a chawlhsan tawh hnuah boxing khawvelah a let leh niin a sawi.

Kum 53-a upa Mike Tyson hian tun hnaiah training a nei nasa hle a, video a tidarh a, hetah hian a training lai en theih a ni a. Boxing glove a dahthat atanga kum 15 hnua boxing ring chhunga inlan leh tur angin a insawi a ni.

‘Iron Mike’ chuan video-ah hian a la che rang hle a ni tih a lantir bakah a vanglai ang deuha a hnek pawh a la na hle a ni tih a lang thei bawk a. Hetianga a che ve a entir hnuah hian Tyson chuan, “Ka rawn let leh e,” tiin a sawi a ni.

Thla hmasaah khan Mike Tyson hian Instagram lamah boxing ring lama inlan leh a tum thu sawiin, exhibition match khel turin a inbuatsaih thu a lo sawi tawh a ni.

Instagram live-ah Mike chuan, “Kar hmasa atang khan boxing training ka nei tan a, a hautak duh khawp mai a. Ka lo chawl rei tawh a, ka taksa pawh a khawng vek tawh a, ka kut pawh ka thil hnekna velah a na hma hle,” a ti.

“Ka insawizawi a, ngawrh takin ka inpuahchah chho a, tlem tlemin hma pawh ka sawn zel dawn a. Boxing ring chhunga luh leh ngei hi ka tum a, exhibition match ka neih theih ka beisei hle a, chutiang ti thei tur chuan inbuatsaih a ngai a ni,” a ti bawk.

A sawi zelnaah, “Gym lamah ka inbuatsaih ang a, exhibition match ka khel ta a nih chuan round thum emaw, round li emaw tal inhnek thei tur khawpin ka inla fit duh a ni,” a ti.

A sawi anga exhibition match a awm thei dawn a nih pawhin Mike Tyson hian tu ber nge a hmachhawn theih dawn a la hriat theih loh a. A hmelma lian ni thin Evander Holyfield chuan a vawi thumna atan Mike Tyson nen inhnek a duh thu hi a sawi chhuak ve mek bawk a, anni pahnih hi an inhmachhawn leh mai a rinawm ve thei a ni.