21 Mar 2019 09:39

inkhel

​Ka pa nen min khaikhin hi pawi ka ti lo – Mick Schumacher

Formula One chanchina driver ropui ber Michael Schumacher-a fapa Mick Schumacher chuan a pa nen khaikhin a ni chu pawi a tih loh thu a sawi.

Kum 19 mi Mick hi tunah hian Formula 2 lama intihsiak turin a inbuatsaih meka, Formula 2-ah a vawikhat telna tur niin, tun thla tawp ni 29 atanga ni 31 chhungin Bahrain-ah neih a ni dawn.

Mick-a pa Michael Schumacher hi F1 world champion vawi sarih ngawt a lo ni tawh a, Mick hi a pa nen a khaikhin a nih chuan a phur a rih zual phah hle pawhin a rinawm. Mick erawh la naupang hle mahse a zam lo thung.

Michael Schumacher-a fapa a nih avangin Mick hi a pa nen khaikhin a ni lo thei lo a ni ber a, motorsport lam a luhchilh chhung chu a pa nen khaikhin a ni fo reng dawn. Mick chuan, “Ka pa nen a min khaikhin hi pawi tihna ka nei ngai lo.

“F1 chanchina driver ropui ber leh tha ber nena khaikhin nih chu duhthusam a ni zawna, min khaikhina chu ka mi entawn ber leh ka pa a ni hi ka tan chuan a hlu em em a ni. Ka pa nena khaikhin ka ni hi ka ngai hlu a, ka inzir belh zelin hma pawh ka sawn zel a ni,” a ti.

Mick hi tunah hian Prema team-ah a awm mek a, he team hi tuna Ferrari driver Charles Leclerc-a’n Formula 2 title a lak tuma a team-te kha an ni.

Mick hi nikum khan European Formula 3 series-ah a lo champion tawh a, tunah hian Ferrari driver academy-ah a awm mek bawk a ni.