30 Jan 2020 02:39

inkhel

Ka na tawrh hi sawi fiah thiam chi a ni lo: Vanessa Bryant

Vanessa Bryant chuan a pasal te chetsual hnua a vawi khatna atan a rilrua thil awm a sawi chhuak a, a thil tawrh mek chu a nat dan sawi fiah thiam chi a nih loh thu a sawi.

Helicopter chesuala a pasal leh fanu a chan hnuah Vanessa Bryant hian Instagram lamah a awm dan chu a tarlang a. “Tuna na ka tawrh mek hi a nat dan chu sawi fiah thiam chi a ni lo a, na tak hi a ni tawp mai,” a ti.

“Kobe leh Gigi te khan kan hmangaih em em a ni tih an hria a, khatiang hre chung khan min kalsan a ni tih ka ngaihtuah hian tlem chuan min chhawk ve deuh chuan ka hria a. An kalsan tak an chhungte hian kan nunkawng kan zawhho thei kha vannei kan inti a. Duhthusamah chuan kumkhuain kan hnenah hian awm thei se kan ti hle a. Kan tana malsawmna duhawm takte hi min laksak hma em a ni,” a ti bawk.

Kobe Bryant leh Vanessa Bryant te chu 2001 ah khan an innei a, an pahnih hian fanu pali an nei hman a. A upa ber Natalia chu kum 17-a upa niin, a naupang ber Capri chu thla 7-a upa chauh a la ni a. Gianna kha kum 13-a upa niin, kum 3-a upa Bianka a awm bawk a ni.

“Engtin nge kan awm zel dawn tih hi ngaihtuah ngaihna pawh ka hre rih lo a, an tel loa nun hman zel chu ka zuam lo hle a. Chutih rualin, tuk tin kan tho chhuak ang a, Kobe leh Gigi te duhthusam thei ang ber tura nun hman hi kan tum a tul a ni,” tiin Vanessa chuan a sawi.

“An pahnih kan hmangaihna hi a tawp thei dawn hauh lo a, eng ang taka nasain nge kan hmangaih tih pawh hi a tehna awm pawh ni se teh chhuah sen a ni lo ang. Tunah tak chuan kan bulah awm se, kuah ngawih ngawih theih hi ka chak ber a ni,” a ti bawk.

A sawi zelnaah, “Kobe te pafa ruala nunna chan chhungte kan tawrhpui tak zet a, an lusunna kan sunpui tak meuh a ni,” a ti a. Nunna chan ve chhungte chhawmdawlna atan sum tuak a nih tur thu a sawi chhuak bawk a ni.