08 Jul 2020 10:14

bakteaJr.

Mizo tlangval

​Ka lo kir thei hi ka lawm hle: Alonso

Nimin lam khan Formula 1 driver, kum 2018-a chawl tawh Fernando Alonso chu a lo kir tur thu tarlan a ni tawha, vawiin lam khan a lo kir thu hi official-a puan a ni.

Spaniard driver Alonso hi vawi hnih world title a lo lak tawhna team Renault-ah a kira, nakkum atang hian Renault driver ni leh dawnin, kum hnih chhung atan an inrem phawta, official-in Renault hian an puang tawh.

Kum 39 tling mai tawh tur Alonso chuan F1-a a rawn kir thu sawiin, “A hmasa berah chuan F1-a ka lo kir thei hi kan lawm hle a, a dawt lehah chuan experience ka lo neih ropui tawhna ber team-a ka kir thei hi ka lawm hle bawk.

“A tira ka tum dan kha chuan kum 2018-a chawlha, F1 pawn lama nun tem chhin a ni a, chubakah kum 2021-a dan thlak danglam tur hi ka thlir tel bawk.

“Dan thlak danglam hi COVID avangin kum khata sawn hlat a ni a, kum hnih ka awl hnua 2021-a ka tel leh thei tur hi ka lawma, inpuahchahna hun ka nei a, team siam thata, season tha tak hman ka tum dawn.

“Kuminah champion tur pakhat chauh an awma, nakkumah pawh an ni leh ngei anga, mahse 2022-a dan thar an kalpui hunah erawh kan intluktlang thei deuh tawhin ka ringa, team tinte kan inkhairual anga, eng emaw performance ti tha vak thei hmuhchhuah vel a theih tawh lovang.

“Inpuahchahna hun tunah hian kan nei a, ka hahdam em em a, kum 2021 hian enge a rawn ken dawn ka hria a, kum 2022 ah hian beisei ka nei sang hle a ni,” a ti.