British heavyweght boxer Anthony Joshua chuan Andy Ruiz laka a world champion title a hloh hnuah a lo kir leh tur thu a sawi.

Sunday zing; Madison Square Garden-a inhnekah kum 29 mi AJ hi chak zawk tura rinkai a ni a, mahse beisei loh zawk Ruiz chuan round sarihnaah knock-out in a hneh.

AJ hian boxing a luhchilh hnuah Ruiz chiah hi a la hneh lova, a bakah hnehna la chang vekin, Ruiz-a lakah hian a IBF, WBO leh WBA world heavyweight title te a hloh.

Joshua chuan Ruiz a hneh loh hnuin, “Ka zinkawng zawh meka ka thil tawn pakhat ve mai a ni a, boxing a ni a, tunah chuan thil thlen dan kha chiang zawka ka zir a ngai. Ka inzir anga, a hma aia tha in ka lo kir anga, kan inhnek leh ngei ang.

“Zinkawng thui tak kan zawh meka, heti ang avang mai mai hian tawp hi kan tum lova, tun aia thui hi kan la kal thei tih ka hria a ni,” tiin post-fight conference-ah a sawi.

AJ leh Ruiz-te inhnek contract-ah hian AJ-a tan rematch theihna zeh tel a ni a, rematch a awm leh ngei dawn niin a lang. AJ-a promoter Eddie Hearn chuan kumin kum tawp lamah AJ leh Ruiz te chu an inhnek leh ngei a rinawm thu a sawi bawk a ni.