01 Nov 2019 09:56

bakteaJr.

Mizo tlangval

​Ka la that belh zel thei: Hamilton

Formula One World Champion vawi nga lo ni tawh Lewis Hamilton chuan kum 34 lai ni ve tawh mahse tun aia a la that belh zel theih a inrin thu leh, a that theih ang ber a la nih loh thu a sawi.

Tun lai F1 driver zingah Bristish driver Hamilton hi a ‘ber’ tih ngam a ni a, tunah hian a world championship title parukna la leh mai thei dinhmunah a ding meka, United States Grand Prix tlan leh mai turah hian a chet dan a zirin world championship title parukna a la thei dawn.

A team mate Valtteri Bottas-a lakah Hamilton hian US GP-ah point 22 a hloh lo a nih chuan a champion tawh dawna, World Champion nih tam lamah vawi 7 world champion ni tawh Michael Schumacher chiah a pha tawh dawn lo a ni.

Mercedes driver Hamilton chuan, “Title panga hi ka lak ka ring ngai lova, tunah title parukna la mai thei dinhmunah ka ding meka, title parukna hi ka la thei a nih chuan ka tan chuan a awihawm loh hial dawn. Ka that theih ang ber ka la ni lovin ka inhria a, ka la that belh zel thei a, hmasawn zel ka la tum a ni,” a ti.

Sawi lan tawh angin Hamilton hi kar leh thawhtanni hian a World Championship title parukna la ngei tura ngaih a ni a, a champion rih dawn lo a nih chuan Bottas chu US GP-ah pakhatna a nih ngei ngei a ngai a, Bottas hi pakhatna pawh ni mahse US GP-ah Hamilton hi pariatna aia hniam a nih chauhvin a la champion rih dawn lo.

US GP-ah kum sarih chhungin Hamilton hi vawi nga ngawt a chak tawha, a che chhe palh viau te a nih loh chuan kar leh tir lam hian a World Championship title parukna a lak ngei a rinawma, tunah hian World Champion ni hnem ber dawttu ni mekin, he nihna hi Juan Manuel Fangio nen an intawm mek a, Fangio hi a tlansan thuai dawn niin a lang a ni.