05 Sep 2019 05:21

inkhel

Ka la duhtawk dawn lo: Roger Federer

Roger Federer chu US Open atangin a tla fel tawh a, a tlak hnuah hian inkhelh zui zel a la tum zel tur thu sawiin, a la duhtawk loh thu a sawi.

Federer chuan, “Thil theih loh a ni miah lo a, Grand Slam title lak belh zel hi ka la duh a. Kum eng emaw zat kaltaah kha chuan ka thil tum ang hi a tih theih tak tak pawh a rinawm lo a, mahse ka taksa a fit tha a, inkhelh zui zel hi ka la tum a, duhtawk mai ka la tum rih lo,” a ti.

Grigor Dimitrov a hneh loh atanga darkar 48 hnuah Roger Federer chuan tennis khawvel atanga inthiarfihlim mai a la tum loh thu sawiin, a taksa a la fit pangngai bawk a, Grand Slam title lak belh ngei a la tum hle.

Swiss star Federer hi kum 38-a upa a ni ve tawh a, heti chung hian tennis khawvelah pawh a chungnung berte zinga mi a la ni thei reng a. Tun thla tawp lamah pawh hian Geneva khawpuiah Laver Cup an khel leh dawn a, hetah hian tel leh ngei pawh a tum viau a. Laver Cup hi amah leh a kaihhruai management group huaihawt niin, Europe vs The World te chu an inhmachhawn leh dawn a ni.

Flushing Meadows hi Roger Federer tan chuan hmun duhawm tak a ni meuh tawh lo a, New York khawpuiah hian 2008 atang khan title a la leh tawh miah lo a, 2015 hnuah phei chuan quarter final a pel thei tawh lo a ni.

Rafael Nadal leh Roger Federer te hi an vanglaiin vawi 40 chu an intawng tawh a, heti chung hian US Open bikah chuan an la inhmachhawn miah lo a. Hun lo awm zel turah pawh anni pahnih hi Flushing Meadows-ah chuan an inkhel lo tluanchhuak thei tlat a ni.

Mi thenkhatin Federer chu Grand Slam title lak belh leh theih a inbeisei chiah em tih an zawt a, Swiss legend chuan thil lo thleng tur a hriat lawk bik loh thuin a chhang a. Hetih rual hian title lak belh leh theih ngei chu a duh thu sawiin, chutiang tur chuan tennis chu la khelh zui zel a tum thu a sawi a ni.