Deontay Wilder chuan a khingpui tur apiangin an la hlau zel nia a hriat thu a sawi a. A hmachhawn leh tur Tyson Fury pawhin a hlau ngei nia a hriat thu a sawi a ni.

WBC heavyweight champion Deontay Wilder hi professional boxing a luhchilh hnuah vawi 40 a inhnek tawh a, a vaiin a la chak vek a, vawi 39 chu a khingpui a knockout a, a inhnek tawhah a tumpui pakhat chiah knockout loh a nei a ni.

American boxer Deontay hi December 1 khian Los Angeles khawpuiah Tyson Fury (27-0) nen an inhnek dawn a, boxing ngainatute tan chuan inhnek en chakawm ber pawl a ni ang.

January 2015 khan Wilder hian a vawi khatna atan heavyweight title hi a la tan a, hemi hnuah hian vawi 7 a lo humhim tawh a, a vawi 8-na atan humhim a tum leh dawn a ni.

Kum 32-a upa Deontay Wilder chuan, “Heavyweight division-ah chuan kei aia hlauhawm hi an awm lo a, ka hlauhawm fal hle a. Tu pawh hmachhawn dawn ila min hlau thei hlawm hle a ni,” a ti.

“Hlauhna thinlung an neih hi chu ka hre thei khawp mai a, ka khingpui turte’n min hlauh hi chuan keimahah hian engtin emaw ni a rawn thawk thin a. ’Bronze Bomber’ ka nih chiah phei hi chuan ka khingpuite tan a fuh lo viau zel a ni,” a ti bawk.

A sawi zelnaah, “Boxing ring chhunga ka luh tawh chuan ka hmachhawn tawhte laka that chhuah ka tum ngai lo a, ring chhunga ka luh chhan kha ka ti mai thin a. An mit ka en hian an rilru put hmang chu ka hre thei mai thin a, a tam zawkah chuan hlauhna ka hmu chiang viau zel a ni,” a ti.

Wilder hi WBA, IBF leh WBO champion Anthony Joshua nen an inhmachhawn dawn emaw tih a ni a, mahse engmah inremna an la siam lo a. Hetih lai hian Wilder chuan Fury a hmachhawn tur chu fuh a tih zawk thu sawiin, Anthony Joshua aia boxer tha a hmachhawn dawn niin a sawi.

“Joshua chu robot ang mai a ni a, a lu pawh a tiche ngai lo a. Fury hi chu a sei a, a khirh em em a, ka knockout ka ring lo deuh a, point hmanga ka hneh ngei erawh ka ring a. Fury hi Anthony Joshua ai chuan hmachhawn a khirh daih zawk dawn a ni,” a ti.