Angel Di Maria chuan khawvela player tha ber nia an sawi chu a lo khelhpui ve tawh hlawm tih sawiin, heng zingah hian Lionel Messi tluka tha an awm loh thu a sawi.
Argentine midfielder hian khawvela footballer tha ber pawla sawi a khelhpui ve nual tawh a, Cristiano Ronaldo, Lionel Messi, Zlatan Ibrahimovic leh Wayne Rooney te bulah a lo khel kual ve tawh a ni.
Paris Saint-Germain midfielder Angel Di Maria chuan 2010 leh 2014 inkarah khan Santiago Bernabeu lamah hun a hmang a, Cristiano Ronaldo nen khel dunin Real Madrid chu UEFA Champions League title bakah La Liga title leh Copa de Rey vawi hnih a lakpui hman a ni.
Manchester United a zawm leh a, Premier League huangah hian beisei angin boruak lian tak a tawng ta lo a, heti chung hian England tana goal thun hnem ber Wayne Rooney chu a khelhpui hman tho a. Rooney hi Di Maria chuan a dah sang hle a ni.
Team hrang hrangah footballer tha tak tak lo khelhpui ve nual tawh mah se Di Maria chuan ram tana a lo khelhpui tawh Lionel Messi tluka dah san a neih loh thu a sawi chhuak.
“Player tha leh ropui tak tak ka khelhpui thei hi a lawmawm ka ti a, a bik takin Wayne Rooney, Zlatan Ibrahimovic, Cristiano Ronaldo leh Lionel Messi te ka khelhpui thei hi ka lawm tizualtu a ni a. Anni nena khelh theih chu duhthusam tifamkimtu a ni ber mai,” tiin Di Maria chuan a sawi.
“Anni ho hi PlayStation-ah pawh ka player hman ber thinte an ni a, a nihna takah chuan games vela ka hman bak hi chu suangtuahnaah hian a awm thleng ngai lo a, a takah ka khelhpui ang tih hi ka ring pha ngai lo,” a ti.
A sawi zelnaah, “An inkhel hi ka en nasa thei hle a, ka khelhpui thei ta hial mai hi a mak ka ti zawk a. Anni ho zingah rau rau chuan Leo hi a tha ka ti ber a. Cristiano hi a tha hle a, Neymar pawh hi thiam tak chu a ni,” a ti.
“Ibra hi pa danglam tak mai niin, khelmualah duh ang takin a che thei zel mai a, mize tha tak mai niin, kan inngeih hle a. Rooney pawh hi mi pakhat chu a ni ve hrim hrim a, hetiang taka pa khauh hi a ni ang tih ka ring pha ngai lo,” a ti bawk.
“Player tha tak tak ka khelhpui tawh zinga tha ber thlang dawn ta ila, duh thlan thiam chu a harsa viau ang a. Thlan loh theih loh a nih chuan Lionel Messi hi ka thlang ang,” a ti.