12 Feb 2020 04:46

inkhel

Ka khelh dan leh Liverpool khelh dan a inmil lo: Ceballos

Dani Ceballos chuan Liverpool hnawla Arsenal a zawm chhan chu a inkhelh dan leh Liverpool khelh dan a inmil loh vang niin a sawi.

Real Madrid attacking midfielder hian loan-in Arsenal a zawm mek a, Emirates Stadium lam a pan hma khan European champion Liverpool pawhin loan-a lak tumin an bia a, Anfield pan aiin Gunners lama kal a thlang ta a ni.

Liverpool chu Jurgen Klopp kaihhruaina hnuaiah an che tha chho hle a, Champions League title an la a, chumi hnuah kum 30 zet an lo nghahfak tawh league title la thei dinhmunah an ding leh mek a ni.

Arsenal ve thung chu Liverpool an harh thar mek laiin eng ual an ang thei lo hle a, Mikel Arteta hnuaiah tlem chuan an inthlak danglam ve tan mek a. Arsene Wenger thlaktu Unai Emery hnuaia an chet chhiat lutuk kha tunah chuan an kalsan ve dawn tan a ni.

Mi thenkhat chuan Ceballos duh thlan chu an hrethiam lo a, zawhna pawh a awm phah nual a. Hetiang karah hian Spanish midfielder chuan thutlukna a siam fuh nia a ngaih thu a la sawi ve thung a ni.

Ceballos chuan, “Liverpool te ang club tha tak maiin min beisei ve kha a lawmawm ka ti a, chutih rualin Unai Emery vang khan Arsenal ka thlang a. Tun dinhmunah chuan Liverpool-ah chuan ka khel tha theiin ka ring chuang lo,” a ti.

“Unai vang liau liau khan Arsenal hi ka zawm a, Arsenal hi club lian leh ropui tak a lo ni bawk nen duh ka thlang fuh ka la ti reng tho a. Jurgen Klopp chu coach ropui tak mai a ni tih ka hria a, chutih rual chuan ka khelh dan leh Liverpool khelh dan hi a inmil vak lo a ni,” a ti bawk.