Ka inthlahdah dawn lo: Lewis Hamilton

14th September 2018, 01:09AM

Lewis Hamilton chuan kar tawpa Singapore Grand Prix-ah inthlahdah a tum loh thu a sawi a, hma hruai fal tan viau mahse a tan dan pangngai renga tan a tum thu a sawi.

British driver Hamilton chuan 2018 Formula 1 drivers’ championship-ah hma a hruai fal chho sawt hle a, Monza-a a chet fuh zarah amah hnaih bertu Ferrari driver Sebastian Vettel aiin point 30 ngawtin a sang tawh zawk a ni.

Tun season chhungin Sebastian Vettel chu vawi 5 a chak tawh a, Lewis Hamilton hi vawi 6 a chak tawh thung a, 2017 tun ang hun vel ai khan Briton driver dinhmun hi a tha tawh zawk a tih theih a. Tuna dinhmun thaa a awm rih avang hian Hamilton chuan a rilru a danglam phah chuang lo tih sawiin, inthlahdah a tum chuang lo hle.

Hamilton chuan, “Singapore Grand Prix-ah pawh a pangngai rengin ka awm dawn a, tuna hma ka hruai dan vel hi ka ngaihtuah em em lo a. Tlemin ka fal ve tan deuh a, hei vang hian inthlahdah ka tum reng reng lo a, a hma ang rengin ka tang zel dawn a, theihtawp chhuah zel ka tum a ni,” a ti.

“Tun dinhmunah chuan ka awm dan thlak tulna a awm lo a, point hmuh belh theihna hun a la tam a, hei vang hian tan mar pat hi a pawimawh hle a. Intlansiak khirh deuh deuh pawh hmabak a la awm a, hei vang hian fimkhur taka chet a pawimawh a, tun hnaiah phei chuan Ferrari hi keini aiin an chungnung chho tlat a, kan lehpel a nih loh pawhin um phak theih hram kan tum zel a ngai a ni,” a ti bawk.

Mercedes hian Singapore-ah hun harsa tak an lo tawng tawh thin a, nikum khan Ferrari car pahnihte chu lap hmasa berah an chetsual avangin Mercedes chu an chak phah hlauh a. Chuti tih lohah chuan an tan Singapore hi hmun duhawm tak chu a ni lem lo hle.

“Dik tak chuan beiseina sang tak neih a harsa duh hle a, kan tih theih ber chu theihtawp chhuaha result tha thei ang ber neih tum hram a ni mai a. Tun hnaia intlansiakah kan che chhe lutuk bik lo a, khatiang kha chhawm zui zel theih hi kan tum tlat dawn a ni,” tiin Hamilton chuan a sawi.

Marina Bay Street Circuit-ah Red Bull pawh Mercedes tan an hlauhawm niin Hamilton hian a sawi a, Ferrari ringawt veng loa Red Bull pawh an ven tel loh chuan an tan chet chhiat palh a awm thei niin a sawi a ni.

Copyright © inkhel.com 2024. All rights reserved.