Ole Gunnar Solskjaer chuan Manchester United kaihruaitu tur dik tak a nih thu sawiin, amah chu a inrintawk thu a sawi bawk.

Norwegian manager chuan thla hmasa khan kum thum chhung atan Manchester United enkawl turin contract a ziak chiah a. Nikum December thla khan Jose Mourinho chu an ban a, Solskjaer hi tun season tawp thleng atan club thuneitute chuan an ruai lailawk a. Mahse, an beisei aia a chet that chhoh avangin contract nghet an ziahpui zui ta a ni.

Manchester United a enkawl tirhin Solskjaer chuan a chet thatpui hle a, mahse tun hnaiah an che fuh lo chho ta zeuh zeuh a, Everton laka 0-4 ngawta an tlawm takah phei chuan Ole Gunnar sawiselna hi a ri nasa hle a, a zawna away game-a vawi nga an tlawmna a ni.

Solskjaer chuan, “Tun hnaiah kan che fuh lo deuh a, min sawiselna a ri nasa nghal hle a. Mi thenkhat chuan ka awm zel dan tur a chiang tawh lo niin an sawi hial a, kei chuan awm zui zel hi ka duh dan chu ania; mahse, chu chu keima thutlukna siam tur a ni si lo,” a ti.

“Ka team te hi ka ring tawk a, keimah ber pawh hi ka inring tawk hle a, tuna chona kan hmachhawn mek hi pal tlang theih ngei ka tum a, kan theih pawh ka ring bawk a. Helai hmun ka rawn pan dawn khan chona hautak zet mai ka hmachhawn dawn tih ka hria a, chutiang inhuama he club hi zawm ka ni,” a ti bawk.

Nilai zanah Manchester United chuan ‘Manchester Derby’ an khel dawn a, Old Trafford-ah an thenawm club Manchester City an lo mikhual dawn a. He inkhel hi a pawimawh dawn hle a, City chuan Premier League title humhim an tumna kawngah chak ngei an mamawh zia an hre chiang a, United lahin season thara UEFA Champions League khel thei tur chuan an tan tlawm a rem tawh lo tih an hre chiang hle bawk a ni.

United player hlui Solskjaer chuan, “Old Trafford ka pan dawn khan ka hun hman chu nuam ka ti vek ang tih ka lo sawi tawh a. Chak loh hi thil nuam a ni reng reng lo a, mahse chona lian tak erawh a ni chiang a. He club lo enkawl tawhtu manager zawng zawng pawhin ka ngaihdan hi chu min tawmpui ka ring,” a ti.

“Result a fuh loh laklawh hi chuan mahni inrintawkna neih that a harsa duh a; mahse, kan tih tur hmabak hlen chhuak thei tur chuan kan rilru put hmang pawh thlak danglam a ngai viau thin a. Ka sawi tawh angin, ka team te hi ka ring zo hle a, tuna chona kan hmachhawn zel tur pawh hi tha takin kan pal tlang dawn a ni,” a ti bawk.