Ka Independence Day chu August 15: Sania Mirza

15th August 2018, 10:08PM

Indian tennis star Sania Mirza chu Pakistani cricketer Shoaib Malik nen an inneih hnuah sawiselna a tawk nasa hle a, mi tam tak chuan Indian pawh ni tawh loin Pakistani a ni tawh ti tein an sawi a. Sania hian Indian a nihzia sawiin, August 15 chu a tan Independence Day a nih thu a sawi.

Pakistan Independence Day leh India Independence Day apiangin Sania hian deusawhtu a tawng thar ziah a tih theih a, hei vang hian tun tumah chuan a tawng chhuah phah a. A pasal chu India leh Pakistan suih zawm a tum vanga nei a nih loh thu a sawi a ni.

Sania Mirza chuan, “Mi tam tak chuan Shoaib nen kan inneih chhan chu India leh Pakistan te inkar boruak siam that kan tum vang niin an ngai a, hei hi a dik lo chiang hle a. Kum khatah vawi khat chu ka pasal nu leh pate tlawh turin Pakistan-ah hian ka kal thin a, hei bak hi chu India ramah ka awm char char zel,” a ti.

Kumin October thla hian Sania Mirza chuan fa a nei dawn a, August 14 khan Sania hian Twitter-ah Pakistani mipuite chu an ram Independence Day lawmpuina thu a tarlang a, hei hi India mi thenkhatin an lo ti el leh hman a, Sania Mirza tan Independence Day chu August 14 a nih thu an hrilh lui kher a, hei hi Sania hian a pai dai thei ta lo a, a chhang zui ta a ni.

Sania chuan, “Vawiin (August 14) hi ka pasal te ram Independence Day a ni a, kan Independence Day chu naktuk August 15 hian a ni a. Thil in hre fuh chiah lo a, ka rawn hrilh fiah ve che a, i hriat dik loh hi i hre fuh tawh turah ka ngai a. I buai teh nuaih sia, engtik nge i tan Independence Day ni ve? I sawi thei mial em?” a ti let a ni.

Copyright © inkhel.com 2024. All rights reserved.