Barcelona player, bazar lama thawm nei ve reng Philippe Coutinho chuan a hma lam hun chu an hriat bik loh thu a sawi.

Coutinho hian nikum January thla khan Liverpool atangin Barcelona hi a pan a, a man a to hle. Barca chuan Coutinho manah hian pound maktaduai 105 vel an senga, add-ons zawng zawng nen phei chuan Brazilian player man hi pound maktaduai 142 vel daih a kai chho thei.

Coutinho hi a man to hle mahse Barca-ah beisei a pha lo em em a, Liverpool-a a that angin a la khel meuh lo a ni ber. Bazar lamah thawm a nei reng a, Chelsea leh Manchester United-te chuan an duh niin sawi a tama, French club hausa Paris Saint-Germain pawhin thawm an nei ring viau.

Coutinho hi tunah hian Copa America khelin Brazil tan a fehchhuak mek a, Copa America a khelh zawhah a hma hun hi a chian mai a rinawm. Coutinho chu a hmalam hun chungchang zawh niin, “Barcelona-ah contract ka nei a, Barca-a hlawhtlin hi ka thil tum a la ni reng. Tunah rih chuan Brazil tan chiah ka rilru ka seng rih a, Barca lama ka hma hun erawh eng nge thleng dawn ka hre lo.

“Ka chanchin tam tak dik lo tak tak thehdarh a ni a, mahse ka hmalam hun hi kan hre bik lo, chu chu thu dik a ni,” a ti.

Coutinho hian season hman zawh tak chiahah khan Barca tan La Liga game 34 a khel a, goal nga a khung. Heng game 34 zinga game 12 te chu subsitute anga a luh an ni nghe nghe a ni.