Odion Ighalo chuan Manchester United tana goal a thun apiang chu a farnu thi ta tana a hlan zel tur thu a sawi.
Nikum December ni 12 ah khan Odion Ighalo farnu Mary Atole chuan a fate sikul kal tur a buaipui a. Hetianga a fate a buaipui lai hian Canada rama an chenna inah a tlu a, kum 43 mi niin a thi zui a. Hetiang thil a thlen hnu hian Ighalo chuan social media lamah Mary Atole nen thla an lak dun chu a tar chhuak a, a farnu thih thu hi mi hriatah a sawi lang a ni.
Kum 30-a upa Ighalo hian Chinese club Shanghai Shenhua atangin loan-in Manchester United chu thla hmasaah khan a zawm a, Chelsea leh Red Devils inkhelh hunah a club thar tan khelh tan ve theih a inbeisei mek a ni.
Nigerian striker hian a farnu Mary Atole hming chu a football boot-ah a chuantir dawn a, Stamford Bridge-a an len luh hunah pawh Manchester United jersey hnuaiah kawr var a ha ang a, hetah hian a farnu hming hi a ziak dawn bawk a. Goal a thun a nih chuan a kawr hi a hlim lang ang a, a goal thun chu Mary tan hian hlan a tum bawk a ni.
“Ka farnu kha Manchester United ngaisang em emtu a ni a. Kan chhungkua hi Manchester United tantu kan ni a, kan vaiin an inkhel kan en thin a. Mary pasal chuan Chelsea a tan thung a, an fate chu Manchester City leh Liverpool tantute an ni a, amah ber kha chu United tan a rinawm reng a ni,” tiin Ighalo chuan a sawi.
“Manchester United ka zawm theihna turin a tawngtai thin a, Watford tana Premier League khawvela ka khelh lai pawh khan United zawm tura min duhsak thu hi a sawi ziah a ni,” a ti bawk.
A sawi zelnaah, “Rilru khawih deuhtu chu a duhthusam angin Manchester United ka zawm ta a, amah ber a awm leh tawh si lo hi a ni a. Van atangin min lo thlir thin ang tih hi ka ring tlat a, hei vang tak hian ka boot-ah a hming ka chuantir ang a, heti hian Old Trafford bakah Manchester United tana ka inkhelhna apiangah a tel ve ziah dawn a ni,” a ti.
“Inkhelh ka chawlhsan hma chu goal ka thun apiangin Mary tan ka hlan ziah tawh dawn a. Ka boot bakah ka kawrah a hming ka ziak dawn a, khawvel hriatah ka bulah a awm reng a ni tih hi ka lantir dawn a ni,” tiin Ighalo chuan a sawi.