26 Sep 2020 01:39

bakteaJr.

Mizo tlangval

​Ka fight dawt leh chu Pacman nen a ni: Mcgregor

UFC division hnih champion hlui Conor Mcgregor chuan Twitter lamah a fight dawt leh tur a puanga, boxing world champion Manny Pacquiao nen a nih thu a puang rup mai le.

Kum 32 mi Mcgregor hian kumin khan MMA a chawlhsan thu a puanga, boxing khawvel lamah a lut leh dawn niin a langa, Pacquiao nen hian an inhnek hun tur hriat nilo mahse, an inhnek ngei dawn niin a lang.

Kum 41 mi Pacquiao hi boxing khawvela division riata champion thei awm chhun a ni a, world title lian tham 12 lai a la tawh bawka, boxer ropui ber zingah a hming lam hmaih a ni tawh dawn lo.

Kum 2017 khan Mcgregor hi boxing khawvelah a lo zuang lut tawha, mi tam takin boxer piang tawh zawng zawnga ropui bera an ngaih, hneh loh nei lo Floyd Mayweather chu Mcgregor hian cho chhuakin, Mayweather hian round 10-naah Irish fighter hi a TKO.

Mcgregor chuan Twitter lamah Pacquiao nen an inbeih tur hi puangin, “Fight nei hnem tura ka inpuahchah mek laiin Covid-in min hnuaia, entu mipui an awm leh hma chu ka inhnukdawk ta riha, ka nghak rei ta hle bawk.

“Hun kal tawh chu hun kal tawh an ni a, tunah chuan ka fight leh tur chu Middle East-ah Manny Pacquiao nen a ni. Tun hnua boxer ropui ber pahnih ka hmachhawn thei tur hi a hlu ka ti takzeta, mahse –in fight erawh an ngam lo a ni,” a ti.