Ka dunk theih loh hunah ka chawl ang: LeBron James

16th November 2019, 10:11PM

LeBron James chuan basketball khelh chu chawlhsan mai a la tum loh thu sawiin, a dunk theih tawh loh hunah chauh chawlh a tum thu a sawi.

NBA superstar LeBron James chuan NFL player Tom Brady nen a intehkhin a, New England Patriots star Tom Brady nen chuan angkhat reng an nih thu sawiin, chawlh lampang chu a rilruah a la awm rih loh thu hi a sawi a ni.

Zirtawpnia Los Angeles Lakers leh Sacramento Kings inkhelh tumin James hi player langsar ber a ni a, point 29 a score bakah assist 11 a nei a, Lakers chu 99-97 in a chakpui a. Staples Center-a an inkhelh hnuah hian kum 34-a upa James chu chawlh a tum hnaih leh hnaih loh hi an zawt a, hetah hian chawlh chu a la tum hnaih loh thu hi a sawi chhuak.

James chuan, “Tunah chuan ka nun kawng thawnthu hi tihtawp ka la tum rih lo a, la kaltir zel hi ka tum dan chu a ni a. Tuna ka awm danah hi chuan chawlh hi a la lang lo hle a, kei leh Tom Brady te hi chu angkhat reng kan ni a. Kan la kal theih chhung hi chu kan la inkhel zel ang,” a ti.

“Inkhelh chawlhsan mai hi ka rilruah a la lang meuh lo a, ka dunk theih loh hunah te chuan ka chawl ve ang a. Chuti a nih ngawt loh chuan inkhelh zui zel hi ka la tum hle,” a ti bawk.

NFL star Tom Brady pawh kum 42-a upa a ni tawh a, Super Bowl-ah vawi 6 ngawt chak thei niin, a aia chak hnem hi an la awm lo a. Hetiang kum zat a nih tawh hnuah pawh inkhel chawlhsan chu a la tum bik lo a ni.

Hei hi hriain vawi 15 ngawt All Star lo ni tawh, NBA champion pawh vawi thum lo ni tawh LeBron James chuan chawlh mai chu a la tum bik loh thu hi a sawi chhuak a ni.

Copyright © inkhel.com 2024. All rights reserved.