Valentino Rossi chuan tun hnaia Yamaha in an bike an khawih danglam dan chu kum hnih chuang zet a lo awh tawh ang a nih thu a sawi.

Italian rider Valentino Rossi chuan kuminah podium vawi hnih a chuang kai tawh a, a chungnung pathum zingah hian a tel zui thei ta meuh rih lo a. Hetih lai hian Maverick Vinales chu Assen-ah a chak a, Petronas SRT rider Fabio Quartararo pawh vawi thum ngawt chu podium-ah a lawn tawh a ni.

Rossi hian a hma deuhin Yamaha chu hmasawn tuma nasa taka hma la niin a lo sawi tawh a. Tun hnaiah an team hi top 4 ah vawi hnih chu an lang thei a, tlar hma atangin intlansiak bul an tan thei tawh bawk a, hei hian Rossi thil sawi chu a tak tak a ni tih a tichiang hlein a sawi theih.

Silverstone-ah khan Rossi chuan, “Yamaha chuan hmasawnna tur thil eng eng emaw an buaipui chho ve reng a. Acceleration, electronics te bakah a ke hnung tha zawk an ngaihtuah chho mek a. Heng thilte hi tun hnai kum hnih leh a chanve vel kalta atanga ka lo awh tawh an ni a, ka duhthusam chu Yamaha hian a takah an chantir chho mek a ni,” a ti.

“Kha leh chen duhthu ka lo sam tawh chu tun hnaiah Yamaha chuan a tak ramah thlentir tumin beihpui an thlak mek a, tun hnaiah hma kan sawn chho tan ngei bawk a, a lawmawm tak tak a ni. Tun aia nasa zawk hian hma kan sawn belh zel ka beisei hle a, kumin kum tawp lam atang chuan inelnaah pawh a langsar pawl kan nih chhoh leh theih tawh ka ring a, season tharah phei chuan a dan a dang viau tawh ang,” a ti bawk.

Yamaha hi an elpuite ai chuan an la hnufual zawk tho a, Ducati te nen khaikhin ralah chuan kawng hrang hrangah an la hniam zawk niin Rossi chuan a sawi a. Heti chung hian theihtawp an chhuah chhoh zel chuan an dinhmun chu a ziaawm ve zel dawn niin a sawi.

“Hma kan sawn a ni tih chu a chiang chho mek a, heti chung hian hmabak kan la ngah hle a. Kan intlansiak reng rengin hmahruaitute ai hian second 7 emaw, second 8 emaw velin kan hnufual zawk tlangpui a. Bike dangte hi kawng ngil laiah chuan 12km/h velin an tlan thei bik thin a ni,” tiin Rossi chuan a sawi chhuak.

“Tun dinhmunah chuan Ducati te anga chakin kawng ngilah chuan kan tlan thei dawn hauh lo a, mahse kan bike kan thawm that zel chuan a hmaa kan um phak lohna let vel chuan hma kan sawn theih ka ring,” a ti bawk.